Војската на САД доцна во саботата соопшти дека радарска аномалија предизвикала привремено затворање на воздушниот простор за цивилни авиони во Монтана, но не бил откриен заканувачки објект.
Како што јавува Ројтерс, Северноамериканската воздушна одбранбена команда (NORAD) испрати борбени авиони за истрага, но леталото „не идентификуваше никаков објект што ќе биде поврзан со радарските удари. NORAD ќе продолжи да ја следи ситуацијата“.
Претходно во саботата, американски борбен авион Ф-22 собори неидентификуван цилиндричен објект над Канада, што е второ соборување во исто толку дена. Канада и Соединетите Држави се во зголемена готовност по епизодата на почетокот од овој месец кога кинески балон на висока височина за кој САД рекоа дека шпионирал, бил следен од Монтана до Јужна Каролина, а потоа бил соборен во близина на брегот.
Американската федерална управа за авијација (FAA) претходно во саботата го затвори, а потоа повторно го отвори воздушниот простор во Монтана, откако привремено ги забрани летовите во област околу 50 на 50 наутички милји (93 на 93 километри) околу Авр, Монтана, во близина на канадската граница.
ФАА издаде слични ограничувања на летот како одговор на претходно осомничениот кинески шпионски балон.
Претставникот Мет Розендејл, републиканец од Монтана, на Твитер објави дека е во контакт со американската војска „и го надгледува најновото прашање околу Авр и северната граница“.
Тој рече дека проблемот е поради „објект што може да се меша во комерцијалниот воздушен сообраќај – ДОД ќе продолжи со напорите да го набљудува и приземји објектот наутро“.
Сенаторот Џон Тестер од Монтана на Твитер напиша дека е „свесен за објектот во воздушниот простор на Монтана и останува во близок контакт со високи претставници на Министерството за одбрана и администрацијата“.
Подготви: Ј. Ѓ.
