Првата детска амбасада во светот „Меѓаши“ денеска од 12.30 часот во Кинотека ќе организира форум театарска претстава за меѓуврсничкото насилство како дел од програмата за мировно образование. Форум-театарот е создаден од 22 ученици од три средни училишта – скопските „Шаип Јусуф“ и „Никола Карев“ и „Кочо Рацин“ од Велес.
-Учесниците споделија примери на однесување на соученици кои вршат насилство и одбегнуваат одговорност. За време на активностите учесниците се насочуваа кон изнаоѓање решенија на зададените проблем-ситуации, кои би ги користеле во случај на пасивност на публиката за време на претставата. Освен театарскиот дел од активностите, со учесниците се развиваа дискусии за нивната перцепција за врсничкото насилство, нивните реакции досега, како и за поттикнување индивидуална одговорност и проактивен пристап во слични ситуации. Се разгледуваа причините за присуството на оваа појава, кој сè е одговорен и кој има обврска да се справува со врсничкото насилство, соопшти „Меѓаши“.
Од активностите на учесниците биле избрани две приказни кои се подготвени за форум-театарската претстава, по што заедно се договориле каква публика ќе поканат на претставите – ученици, професори, советници од локална самоуправа за образование, центри за социјална работа, МВР – одделение за детска правда.
