Кај Коридорот 8 имаме сериозни отстапувања од нивото на автопатската делница во западниот дел од државата, а ние сме се обврзале како држава дека двата главни паневропски коридори ќе ги доведеме на ниво на поголема безбедност, на ниво на автопатски решенија, експресни делници и ќе успееме од кружен тек на Балканот државата да ја направиме крстосница, вели министерот за транспорт и врски Благој Бочварски во интервју за МИА.
-Имајќи предвид дека 30-тина години зборуваме патиштата, за Коридор 8 и 10Д, за сите овие проекти во дел на подобрување на инфраструктурата во државата мора да признаеме дека денеска се уште зборуваме на пример делницата Градско- Дреново која што 20 години се најавува, се зборува дека ќе започне да се гради, денеска се гради, но во меѓувреме имавме едно откажување на еден изведувач, второ откажување на вториот изведувач, на Ранковце-Паланка исто така старт на градежни работи, па застој, откажување на изведувачите, проблеми со проектите, одново репроектирање на делниците од страна на ЈПДП, па повторно влегување во работа, варијации во однос на проектите и тоа значи дека тој модел покажал голем број на слабости во реализацијата на проектите. Токму поради тоа овој модел ние сме го дискутирале и со професори од Градежен факултет, дека овој модел на проектирање и градба несомнено ќе даде подобар прогрес и подобар резултат во работењето и како министер за транспорт за мене, за Владата е клучно ние брзо да ги реализираме и затвориме прашањата во делот на градба на пан европските коридори. А ако сакаме да го напривме тоа час поскоро тоа мораме да го направиме со моделот на проектирање и градба, тоа значи дека компанијата која што ќе биде изведувач на терен да ја има обврската и да проектира и паралелно со тоа да гради, истакна министерот.
Тој додаде дека токму затоа е отворено прашањето за законските регулативи и процедури.
-Треба да се испроектира цела една делница, на пример Тетово- Гостивар, па потоа да се влезе во експропријација на терен, па потоа со одобрение за градба изведувачот да влезе со работа, за да потоа кога се јавуваат одредени репроектирања имаме постојано барања за дополнување на одобрението за градење за измени во тек на градба и тоа ја обременува целата градба на проектот. Во овој проект е предвидена фазна градба што значи дека на одредена делница или локација имаме земјиште кое што е имотно-правно чисто, земјиштето е на државата тогаш таму изведувачот влегува проектира и веднаш влегува со градба. Додека го гради тој дел или таа делница, таа фаза, продолжува со проектирање со експропријација на останатите делници и продолжува со градба и на останатите делници од на пример секцијата Прилеп- Битола или Тетово-Гостивар. Тоа е за нас важно брзо да влеземе и да реализираме и градиме. Овој модел факт е дека не е доволно познат во државата, но и има примена и во околните земји и покажува добар резултат и прогрес на терен. Токму поради тоа е донесен и законот пред некаде 2 години каде што се пропишани процедури на делување и движење се до избор на изведувачот и потоа во останатите фази на реализација. Така што сметам дека наш стратешки и национален врвен интерес час поскоро да ги изградиме пан европските коридори затоа што Македонија веќе време за губење нема, кажа Бочварски.
