Украинскиот претседател Володимир Зеленски поднесе предлог-закон до Врховната Рада на Украина, со кој се предлага 8 мај да биде Ден на сеќавање и победа над нацизмот во Втората светска војна 1939-1945 година.
Ова го истакна украинскиот претседател Володимир Зеленски во своето видео обраќање, пренесува Укринформ.
Според Зеленски, на 8 мај повеќето нации во светот се сеќаваат на големината на победата над нацистите. Светот им се восхитува на сите оние кои го штитеа животот, кои ги фрлија нацистичките знамиња на ослободената територија и кои ги отворија портите на концентрационите логори, кои ја вратија слободата на народите, кои го уништија и го осудија нацистичкото зло.
„На 8 мај 1945 година стапи во сила актот на безусловно предавање на Вермахтот. На 8 мај светот го почитува споменот на сите оние на кои таа војна им ги одзеде животите. Тоа е чиста историја, без идеолошки примеси. И тоа е историјата на нашиот народ, нашите сојузници, целиот слободен свет. Денеска го враќаме во нашата држава“, истакна претседателот на Украина.
Според неговите зборови, Украина никогаш нема да го заборави придонесот на украинскиот народ во победата над нацизмот и нема да дозволи некој да ја избрише улогата на Украинците во оваа победа.
„Нема да дозволиме да се присвои заедничката победа на нациите од антихитлеровската коалиција и нема да дозволиме лаги дека победата можела да се случи без учество на која било земја или нација“, нагласи Зеленски.
Украина го одбележува 8 мај како Ден на сеќавање и помирување од 2015 година. Сепак, многу Украинци веруваа дека Денот на победата над нацизмот, исто така, требаше да се одбележи заедно со Европа, на 8 мај, наместо на 9 мај на Русија.
