Музичката програма на годинешното 63-то издание на фестивалот „Охридско лето“ продолжува со украинската вечер во чии рамки ќе одржи солиситички концерт на пијанистот, маестро Алексеј Ботвинов.
Алексеј Ботвинов е исклучителен пијанист, музички иноватор и продуцент. Тој е еден од најзначајните украински пијанисти и се смета за еден од најдобрите интерпретатори на музиката на Сергеј Рахмањинов. Ботвинов, истовремено е и единствениот пијанист повеќе од 300 пати ги има изведено „Голдберг варијациите“ на Бах.Во ноември 2015 година Ботвинов беше прогласен за Народен уметник на Украина – највисоко национално уметничко признание, а истата година го основа Меѓународниот фестивал „Одеса класикс“ чиј претседател и уметнички директор е токму тој. Од неговото основање па до денес, фестивалот има сензационален успех и станува еден од најзначајните фестивали во Украина и еден од водечките фестивали во Европа.
Во 2020 година Алексеј Ботвинов е одликуван со орденот „Ѕвезда на Италија“ со одлука на Претседателот на Италија, а истата година ја добива и наградата „Вилијам Тел“ што му ја доделува Швајцарската влада.
Во 2021 година Ботвинов започнува соработка со виолинистот Даниел Хоуп со кој има снимено це-де за продукциската куќа „Дојче Грамофон“ со музика на Алфред Шнитке. По успехот на ова издание, овие двајца уметници повторно соработуваат во 2022 година снимајќи це-де во добротворни цели со наслов „Музика за Украина“, а подоцна истата година снимаат и издание посветено на музиката на украинскиот композитор Валентин Силвестров. Последното снимено издание на Ботвинов што ги содржи третиот концерт на Филип Глас и Двојниот концерт на композиторот Тан Дун треба да биде промовирани ова лето.
За настапот на маестро Ботвинов е резервирана сцената на катедралната црква „Света Софија“ од 21 часот. На програмата се Бах, Шопен, Брамс, Скорик, Силвестров, Караманов и Рахмањинов.
