Собранието денеска во рамките на 123-тата седница ја заврши расправата за Предлогот за пристапување кон измена на Уставот со кој се предвидува вметнување на Бугарите и на уште пет етнички заедници во Преамбулата на Уставот.
Последен за збор беше пријавен координаторот на пратеничката група на СДСМ Јован Митрески по чие излагање претседателот на Собранието Талат Џафери ја прекина седницата и најави дека за продолжувањето пратениците ќе бидат дополнително информирани.
-Констатирам дека претресот е завршен. Тука ја прекинувам работата со оваа седница, а за продолжувањето ќе бидете дополнително известени, рече Џафери.
По прекинувањето на седницата се слушаа негодувања од пратениците од опозицијата кои при носењето на дневниот ред за седницата гласаа против.
За усвојување на точката на дневен ред е неопходно да гласаат минимум 80 пратеници. Тоа е првата од вкупно трите фази неопходни за промена на Уставот. При носењето на дневниот ред на седницата 70 пратеници гласаа „за“, а 47 беа „против“. Расправата согласно Деловникот на Собранието можеше да трае 10 работни дена.
Координаторот на пратеничката група на ВМРО-ДПМНЕ Никола Мицевски го повтори дврдокорниот став и уште еднаш ја потврди единствената заложба на партијата дека „парламентарни избори мора да има“.
„Уставни измени не се прават врз основа на натурање и диктат. Уставни измени под диктат нема да има, но предвремени парламентарни избори мора да има, порача денеска координаторот на пратеничката група на ВМРО-ДПМНЕ Никола Мицевски.
Премиерот Ковачевски од собраниската говорница истакна дека предлогот за уставни измени е наш, македонски, невистините се тезите дека е под диктат од било кого.
„Предлогот е наш македонски, предлогот е базиран на Европскиот Предлог и Договор од 2022-та година, со кој државата после долги години чекање конечно ги отвори преговорите за членство. Предлогот е напишан тука во Скопје. Предлогот се дебатира во македонското Собрание, во Скопје. И затоа, со цела одговорност ги отфрлам лажните и невистинити тези дека постои некаков диктат, од било кого, за било што“ рече премиерот Димитар Ковачевски на собраниската седница за уставните измени.
Тој додаде дека постои само нашата сегашна, а сепак историска можност да направиме нешто добро за државата и со усвојување на уставните измени да не стоиме во место, да не каскама, да не чекаме, туку да чекориме кон полноправно членство во ЕУ.
„Ако за момент ги видиме фактите, ја погледнеме вистината во очи, ќе видиме дека на македонски јазик се говори и пишува во Брисел, ќе видиме дека поддршката за нашиот вековен идентитет се случи и во Берлин, и во Вашингтон, во сите најважни европски престолнини. За прв пат се потпиша Договор на македонски јазик со Европската Унија, конкретно Фронтекс“ рече Ковачевски.
Премиерот додаде дека се случи се спротивно од тоа што го заговараа домашните политиканти, никој не нѐ асимилира, не нѐ загрози, не нѐ нападна, туку напротив државата стана посилна, поцврста и зад неа стојат најголемите и најсилните.
Внесувањето на Бугарите во Уставот е услов за земјава да ја одржи втората меѓувладина седница и да ги продолжи преговорите со Европската Унија за полноправно членство во Унијата.
Ј. Ѓ.
