Многу лидери на радикалната десница напредуваат на популистичката реторика која ги оцрнува воспоставените институции, означувајќи ги како корумпирани или заговорнички. Ова намерно предизвикување ерозија на довербата во демократските процеси создава атмосфера каде што насилството се гледа како средство за исправање на согледаните неправди, се вели во анализата објавена на „Рацин.мк“.
Тоа се забележува и од случајот Вања, односно двојното убиство, по кое радикалните десничари започнаа со ширење на теории на заговор и дезинформации за работата на полицијата.
Во оваа анализа се истакнува дека токму тука лежи клучното поврзување на насилството и десницата која, како во светот така и кај нас, дрматично се радикализира. Во овој контекст, Бразил беше сведок на подемот на Жаир Болсонаро, чиј анти-естаблишмент дискурс придонесе за зголемување на насилството, вклучително и против еколошките активисти во Амазон.
Радикалните десничарски идеологии имаат тенденција да бидат авторитарни по природа, промовирајќи строго придржување кон одреден збир на вредности. Оваа нетолеранција кон спротивставените мислења или алтернативниот начин на живот може да се манифестира во насилни дејствија против согледаните закани за воспоставениот поредок.
Одбраната на „традиционалните вредности“ како што ги замислиле овие групи најчесто е „само на хартија“. Може да видиме дека статистички, најголем процент на лица кои извршиле семејно насилство се од радикална десничарска провиненција, која во основа силно ги промовира семејните вредности, се вели во анализата.
