Колку ќе ни опстане Македонија, колку ќе опстане македонскиот јазик зависи само од нас, а не од кој било друг и не може никој друг да го избрише јазикот кога тој веќе постои, освен ако ние самите не го заборавиме, порача за Слободен печат професорот Ванчо Узунов коментирајќи го однесувањето и дејствувањето на опозицијата.
„Тие стравови се непотребни, ама лоши политичари кои не знаат да испорачаат добри реформи се врзуваат на приказни да ги заплашат граѓаните. Па велат ЕУ не не сака, ЕУ не е фер кон нас. Не, ЕУ ниту е фер ниту е нефер. Таа е она што е, ние сакаме да станеме членка таму и да го направивме оние реформи што ќе значат подобар живот за нас. ЕУ ниту ќе се подобри, ниту ќе се влоши ниту со Македонија ниту без Македонија. Ние ќе сме тие што ќе бидеме нето добитници на крај. Сите оние што мора да одат во ЕУ за да имаат подобар животен стандард ќе останат да живеат тука и тоа тука ќе го постигнат, ако ние станеме земја членка на ЕУ. Затоа се потребни тие реформи, ама тие што се неспособни ги кочат реформите затоа што им е страв“ порача Узунов.
Тој смета дека опозицијата, пред се најголемата опозициска партија игра на карта на емоции, а дополнително за целиот период од седум години не дала ниту една конкретна идеја за каква било реформа.
„Една од партиите во опозицијата го тера целиот процес за да ги убеди граѓаните да гласаат за неа не врз основа на разум и рационалност, туку врз основа на емоции. Ги носи на емотивно ниво и граѓаните ги плаши од ЕУ и Бугарија и себе се поставува како нивен заштитник пред тие „страшни вештерки и ѓаволи“. Едно со друго нема врска, се зависи од нас. Но таа партија така делува, е сега како граѓаните ќе одлучат тоа е друго прашање. Постојаната влада си има свои особености, но опозицијата само на елемент на емоции и стравови ги собира поените. Дали опозицијата еднаш излезе со една предлог реформа? Јас седум години не сум ја чул да каже еве ова го предлагаме, за која било сфера од економијата. Сега и да каже пред избори тоа ќе биде ветување, работата беше во овие седум години нешто да се предложи, како што тоа опозиција го прави во многу други држави“ заклучи Узунов.
