Кој е виновен што учениците со потешкотии сè уште немаат образовни асистенти во училиштата? Министерката за образование и наука Весна Јаневска вели дека МОН ја заврши својата работа, а училиштата со ресурсни центри го распишуваат конкурсот за ангажирање асистенти. СДСМ ја обвинуваат Јаневска за неодговорност и немање емпатија.
„Втор ден од учебната година а родителите на децата со потешкотии се се повеќе гневни затоа што и денес нема образовни асистенти. Нивните деца се дискриминирани на почетокот на учебната година! Наместо во училишните клупи, седат дома бидејќи министерката за образование, Весна Јаневска, не ја заврши навреме постапката за вработување на образовните асистенти“, изјави вчера Весна Баковска од Комисија за образвание на СДСМ.
Таа истакна дека „родителите се во агонија како да ги организираат секојдневните обврски бидејќи нивните деца не може да следат настава, а министерката наместо да покажае разбирање и емпатија, ја лаже јавноста дека проблемот ќе биде решен деновиве“.
„Процедурата за вработување на образовните асистенти започна пред неколку дена и ќе трае цел септември, што значи дека децата со посебни потреби од настава ќе изгубат месец дена. Уште поголем проблем ќе биде ако по месец дена добијат нов асистент кој ќе треба да го прифатат и да се прилагодат. Весна Јаневска да престане да лаже! Зема над 115.000 плата! 3,5 пати поголема плата од наставниците и професорите, и требаше со време да мисли на децата со потешкотии и на нивните семејства пред почетокот на учебната година!“, изјави Баковска.
Министерката за образование и наука Весна Јаневска, порача дека децата со попреченост имаат и ќе имаат асистенти.
Таа посочи дека Министерството ја заврши својата работа, а училиштата со ресурсни центри го распишуваат конкурсот за ангажирање асистенти
Веќе се обезбедени 815 асистенти, а за 200 асистенти чекавме ребаланс на буџетот за да ги обезбедиме средствата. Министерството за образование и наука (МОН) ја заврши својата работа, а училиштата со ресурсни центри го распишуваат конкурсот за нивно ангажирање, рече Јаневска.
-Тие требаше да планираат кога да го распишат конкурсот, кога да ги објават конкурсите во весниците, зашто слушам дека велат оти МОН требало да им каже кога да ги објават конкурсите. Зошто поставуваме директори на училишта ако не си ги знаат своите основни обврски, рече Јаневска во одговор на прашање при денешната посета на скопската компанија „КАЗ груп“ каде се спроведува практична работа за дуално образование.
Денеска, како што кажа, се потпишуваат договорите со 815 асистенти, а конкурсот за 200-те асистенти е во тек.
-Апелирам до родителите, до раководствата на училиштата и до наставниците дека ниедно дете не смее да седи дома. Сите мора да бидат примени во училиштата. Има наставници, има инклузивни тимови, има психолози, педагози, дефектолози, некаде има и социолози – тие треба да се подготвени да ги примат децата. Асистенти ќе има и овој пат ќе бидат во поголем број од претходно. Наредната година ќе има уште поголем број ако има потреба, посочи Јаневска.
Ј. Ѓ.
