Пишува: ДЕХРАН МУРАТОВ
Пред почетокот на учебната година на социјалните мрежи стана вирална порака која гласеше од прилика вака: „Oдвоjте 5 минути на вашето дете да му објасните дека без разлика дали е висок, низок, дебел, слаб, црн или бел, поинаку облечен, не се помалку вредни, ниту поинакви. Научете ги да не исклучуваат никого затоа што се „различни“ итн…
Но, кој ќе одвои 5 минути да им објасни на родителите, наставниците, директорите дека нема „наши и нивни“ деца (ученици)?!
Пред некој ден една родителка се пожали дека во ОУ „Раде Кратовче“ во Кочани има дискриминација врз учениците Роми од страна на одредени наставници.
„На родителска една мајка истакна дека децата (Македонци) се отпишуваат од училиштето поради „циганските деца“. Наставничката (Анкица) секогаш ги става македонските дечиња напред, а ромските дечиња позади и ги учи родителите да ги префрлуваат децата во други училници, за да остане цел клас само со ромски ученици“, изјави Емилија Исаинова за Радио Кочани, а потоа и заромската политичка партија АВАЈА.
Директорот на училиштето Глигорчо Гацевски во изјава за Радио Кочани демантира дека училиштето се претвори во „ромско“, бидејќи бројот на нивните (мисли на учениците од ромска етничка припадност) е иста во споредба со другите учебни години, односно околу 180 деца, додека се намалува бројот на нашите ученици (мисли на учениците од македонска етничка припадност).
Директорот вели дека не прави разлика меѓу учениците, но се додека ги дели на „нивни“ и „наши“ ученици и тоа во неколку наврати, поделбата е повеќе од очигледна!
Не сакам да го коментирам делот кај што директорот вели: „има одлични ученици ѝ од Ромите“.
Да потсетиме на случајот на дискриминација на малата Алара Рустемова, во истото училиште за кое известуваше ЦИВИЛ Медиа во 2019 година: „Му рече на наставникот дека и се повраќа, тој и вели ‘ај не ми прави цигански работи’, и од тој ден ќерката се плаши, постојано плаче и не сака да оди во училиште“, изјави тогаш мајката Есма Рустемова.
Или на случајот од 2023 година на Алејна Исмаиловска која реши да носи марама, во основното училиште „Малина Попиванова“, Кочани. „Шамија може во џамија да носиш, а во училиште ти е забрането“, со овие зборови и се обратија класната раководителка, а подоцна и педагогот и психологот.
Директори, наставници, педагози, пслихолози, родители… оставете си ја омразата, национализмот и поделбите пред влезот на училишниот двор. Барем во училиште мора сите да се исти и еднакви!
Teкстот е личен став на Авторот. Извор: ЦивилМедиа
