Пишува: ИВОН ВЕЛИЧКОВСКИ
Дали значењето на Коридорот 8 како одбранбена компонента на (Северна Македонија во) НАТО е причина да го опструираат властите во Скопје?!
При известувањето за „културната дипломатија“ на Силјановска-Давкова во Софија, медиумите на македонски не посветија особено внимание на делот од соопштението од Кабинетот на бугарскиот претседател за средбата: „…Претседателот Радев повика и на значително поактивни заеднички напори од страна на Бугарија и Северна Македонија за изградба на транспортниот Коридор 8, кој е од клучно значење за поврзаноста и безбедноста во Југоисточна Европа…“
Изјавата на Силјановска-Давкова од Софија не го споменува Коридорот 8.
Приоритизирањето на коридорите е прашање на финансии, политичка промисла и национална, а не моноетничка стратегија на економско-транспортни и безбедносни инфраструктурни приоритети.
Економската логика на планирањето на финансиите (вклучително задолжувањата) за инфраструктурата се потенцијалната исплатливост и развој.
Безбедносниот аспект, пак, останува целно запоставен од официјално Скопје: Коридорот 8 е и одбранбен коридор на брзо распоредување на НАТО сојузнички сили од Италија преку Албанија, Северна Македонија и Бугарија до Црното Море. Онака како што Коридорот 10 е на располагање за оваа цел со постојната инфраструктура од Егејското Море, вклучително 10Д што ќе се разгранува кон Албанија и Косово.
Оттука, спротивставувањето на Владата и особено на Мицкоски и Николоски кон Коридорот 8 (како претходно кон 10Д), молкот на Мисајловски (и покрај Меморандумот што го потпиша со неговиот италијански, албански и бугарски колега) и пристапот на Муцунски и Силјановска-Давкова да не се мешаат во својата работа – покажува дека државниот врв од ВМРО-ДПМНЕ (и од ВЛЕН, со своите заменици-министри во скоро сите набројани ресори) е подготвен за:
– финансиско заглавување на земјата во нов долг од милијарди евра за „брза пруга“ при скоро целосна неискористеност на постојната и
– комплетно игнорирање на одбранбените потреби и кон сопствените граѓани и кон сојузниците во Северно-атланската алијанса.
Неколку објави на Аташеата за одбрана на Обединетото Кралство (ОК) при Британската амбасада во Скопје и во Приштина деновиве го потенцираа неговото значење и директно ги демантираат обидите за дезавуирање на Коридорот 8 од власта и медиумите блиски до неа:
„Денес поранешниот претседавач на Воениот комитет на НАТО, Лорд Пич, го нагласи значењето на Коридорот 8 за колективната безбедност на НАТО.
Тој (коридор) и овозможува на Командата на Здружените сојузнички сили во Неапол да пренесува сили како Кралскиот Јоркширски Полк од ОК од Италија со брод до Албанија, потоа по коловоз и пруга низ Северна Македонија и Бугарија и кон регионот на Црното Море.“
Аташето за одбрана на ОК во Скопје пренесе и две објави на известувачот на BFBS Forces News, Џејмс Вартон. Во првата тој опишува: „Тековно, персонал на ОК спроведуваат конвој низ Балканот на новоопределениот Коридор 8“, а во втората потсетува: „Убава можност за средба со припадниците на Кралскиот јоркширски полк во Албанија денес. Тие прават историја со тоа што се првите НАТО војници што го користат Коридорот 8 – стратешка комуникациска рута од Јадранското Море до Црното Море“.
Британскиот одбранбен аташе во Северна Македонија ја пренесува и објавата на неговиот колега во Косово: „…Утре се среќавам со Кралскиот јоркширски полк пред да се упатат да му се приклучат на НАТО-КФОР во Косово. Тие ќе транзитираат по Коридорот 8 низ Албанија и Северна Македонија. Стратешки значаен за НАТО, неговата употреба покажува дека сме „Заедно посилни“.
На кусо, државниот врв и коалиционите партнери во владата, се на испит дали ги следат „Патот на свилата“ или економско-одбранбените коридори 8 и 10Д, односно дали стратешки партнери на оваа влада се Пекинг и Москва или Брисел и Вашингтон.
Или конкретно, дали за Мицкоски, Меџити, Николовски, Муцунски, Силјановска-Давкова, Таравари, Мисајловски… целта е:
– земјата да биде територија ПЈРМ во зависност од српскиот и рускиот свет или
– нацијата на Северна Македонија да биде партнер на ЕУ, ОК и САД.
