Одлуката за скандалозните празнични помилување на десет осудени лица на претседателката на Република Северна Македонија, Гордана Сиљановска Давкова, предизвика јавни реакции. И додека се крава прашина околу помилувањата на поранешниот градоначалник на Битола од редовите на ВМРО-ДПМНЕ, Владимир Талески, кој беше осуден на седум години затвор за злоупотреба на службената положба во случајот „Транспортер, на Шенол Маслани, брат на познатиот Шенки Версаче, член на наркокланот „Барон“, Акиф Бејадин Равмановски, осомничен за убиствата во Шиша Бар и за убиството на Орхан Бајрами-Оки во Грција, но и дека пред една недела откако избега од затвор, пукаше и рани лице во Чаир, како и Марјан Ефремов, првоосомничен во аферата „Шпион“, медиуми на албански јазик објавија дека на слобода е Кондовецот Агим Красниќи.
Оваа вест ја објавија медиумите на албански јазик, членови на неговото семејството и негови пријатели споделувајќи фотографии од пречекот по неговото излегување од затвор.
Засега нема информации дали е помилуван како што се објавува на социјалните мрежи, дали е ослободен или е пуштен само на неколку денови?
ЦИВИЛ Медиа вчера (24.102024) постави прашање до Управата за извршување на санкциите во врска со слободата на Красниќи, но до објавување на текстот не добивме никаков одговор.
Кондовецот Агим Красниќи во 2008 година беше осуден на 15 години затвор за злосторничко здружување и поседување оружје и други кривични дела, а по 12 години поминати во издржување на казната избега после слободен викенд од штипскиот затвор. Бегството се случи во 2020 година.
Красниќи во април 2024 заедно со уште двајца македонски државјани беше уапсен во Косово од косовската полиција во Урошевац поради пукање во кафуле, по еден месец бил екстрадиран во земјава. До отслужување на 15 годишната затворска казна му останаа околу три години. Не се знае дали има казна за бегството од Штипскиот затвор и за учеството во пукање во Косово?
ЦДТМ
Преземено: Цивил Медиа
