Работниците ширум Грција рано утринава започнаа 24-часовен штрајк, приклучувајќи се на масовниот протест организиран од синдикатите за да протестираат против економските политики на владата, јави ДПА.
Синдикатите бараат итна акција за справување со инфлацијата, платите што стагнираат и несоодветните социјални бенефиции.
Училиштата, градинките и владините канцеларии се целосно затворени, додека државните болници ќе работат со итните служби, пренесе германската агенција.
И покрај прекините, многу сектори ќе продолжат со нормална работа: супермаркетите, киосците и таверните остануваат отворени, а повеќето самовработени луѓе, вклучително и таксистите, работат како и обично.
Главните поплаки на синдикатите се повеќегодишните поскапувања без зголемување на платите.
Претставниците на јавниот сектор бараат зголемување на платите за 10 отсто и враќање на 13 и 14 плата, што беа намалени.
Лидерите на синдикатот ја обвинија владата на премиерот Киријакос Мицотакис дека не успеала да се справи со инфлацијата и зголемените трошоци за живот.
-Трошоците за живот се многу високи и нашите плати се на пониско ниво, додека високите трошоци за домување ги ставија младите во трагична положба, рече Јанис Панагопулос, водач на главниот синдикат на приватниот сектор, ГСЕЕ.
Како и другите работнички групи, ГСЕЕ ја обвини владата дека „одбила да преземе какви било значајни мерки за да обезбеди пристојни услови за живот на работниците“, пишува Гардијан.
Минималната плата во Грција е 900 евра, додека цените на мало, телекомуникациите и енергијата во земјата се меѓу највисоките во Европа, а левичарската опозиција тврди дека граѓаните плаќаат „британски цени за бугарските плати“.
