Две агенции на ОН оценија дека во 2023 година во светот во просек дневно умираат 140 жени и девојки, или една на секои десет минути како последица на насилство од страна на интимен партнер или член на семејството.
Вкупниот број починати жени и девојки во оваа категорија лани изнесувал околу 51.000, во споредба со приближно 48.800 жртви во 2022 година, соопштија денеска од „ОН-Жени“ и Канцеларијата на ОН за дрога и криминал.
Во извештајот, објавен по повод Меѓународниот ден за борба против насилството врз жените, се наведува дека зголемените бројки главно се должат на порастот на достапните податоци од земјите, а не на реален пораст на бројот на убиства.
Според проценките на „ОН-Жени“, во светот на секои 10 минути се случува убиство на жена од страна на партнер или член на семејството. Двете агенции истакнаа дека „жените и девојките ширум светот продолжуваат да страдаат од оваа крајна форма на родово насилство, без исклучок во ниту еден регион“.
-Домот е најопасното место за жените и девојките, се истакнува во извештајот.
Најголем број убиства извршени од интимни партнери и членови на семејството се регистрирани во Африка – 21.700 жртви. Африка исто така има највисока стапка на убиства според бројот на население – 2,9 жртви на 100 илјади луѓе.
Високи стапки се забележани и на американскиот континент (1,6 жртви на 100 илјади луѓе) и во Океанија (1,5 жртви на 100 илјади). Стапките се значително пониски во Азија (0,8 на 100 илјади) и во Европа (0,6 на 100 илјади).
Според извештајот, намерните убиства на жени во приватната сфера во Европа и Америка најчесто ги извршуваат интимни партнери.
Наспроти тоа, огромното мнозинство убиства на мажи се случуваат надвор од домот и семејството, се вели во извештајот. „Иако мажите и момчињата претставуваат огромно мнозинство жртви на убиства, жените и девојките непропорционално страдаат од смртоносно насилство во приватната сфера,“ се наведува во извештајот.
Се проценува дека 80 отсто од сите жртви на убиства во 2023 година биле мажи, додека 20 отсто биле жени. Но, смртоносното насилство во семејството многу повеќе ги засега жените отколку мажите: речиси 60 отсто од сите намерно убиени жени во 2023 година биле жртви на интимни партнери или членови на семејството, се наведува во извештајот.
Извештајот истакнува дека, и покрај напорите на државите за спречување на убиства на жени и девојки, нивото на овие убиства „останува алармантно високо“.
-Тие често се кулминација на повторувачки епизоди на родово насилство, што значи дека можат да се спречат со навремена и ефикасна интервенција, изјавија двете агенции на ОН.
Меѓународниот ден за борба против насилството врз жените се одбележува на 25 ноември. Годинава навршуваат 25 години од прогласувањето на оваа дата.
