Српскиот претседател Александар Вучиќ денеска изјави дека Србија недвосмислено негира каква било вмешаност во нападот на каналот Ибар-Лепенец и повика на темелна, непристрасна и транспарентна истрага за овој чин на саботажа, јави дописникот на МИА од Белград.
„Неоснованите обвинувања против Србија, изнесени набрзина и без никакви докази, се длабоко неодговорни и загрижувачки. Ваквите неосновани тврдења имаат за цел да го нарушат угледот на Србија, како и да ги поткопаат напорите за промовирање мир и стабилност во регионот“, наведе Вучиќ на Инстаграм профилот buducnostsrbijeav на англиски јазик.
Како што додаде, кога толку брзо и без основа се изнесуваат обвинувања, се поставуваат легитимни прашања за мотивите на овие изјави.
„Дали оние кои набрзина покажуваат со прст без докази се обидуваат да го одвлечат вниманието од сопственото сознание или потенцијалната вмешаност во инцидентот?“, праша Вучиќ.
Србија решително повикува на темелна, непристрасна и транспарентна истрага за овој чин на саботажа, изјави Вучиќ и ги повика меѓународните партнери да помогнат во откривањето на вистината и да се погрижат одговорните да одговараат.
„Покрај поддршката на истражните напори, Србија е подготвена да обезбеди техничка, финансиска и логистичка помош за ублажување на последиците од овој напад. Нашата понуда вклучува експертиза за санација на каналот, финансиска поддршка за реставрација и дополнително снабдување со електрична енергија на погодените области за да се осигураме дека животите на граѓаните не се загрозени“, напиша
српскиот претседател.
Голема акција на силите на косовската полиција се одвива претпладнево во повеќе куќи во селото Варага кај Зубин Поток, во северно Косово, јави дописникот на МИА од Приштина.
Веста во изјава за медиумите ја потврди заменик директорот на полицијата за северниот регион, Ветон Елшани.
– Во тек е полициска рација и засега не можам да кажам ништо повеќе, кратко изјави Елшани.
Засега нема информации дали во акцијата има уапсени лица или е пронајдено оружје.
Претседателката на Косово, Вјоса Османи, премиерот Албин Курти и косовската полиција го оценија како терористички чин синоќешниот напад, по кој останаа без вода неколку градови во Косово, како и електраните Косова А и Косова Б, кои ја кристат водата од каналот за ладење на турбините. Косовските власти за нападот ја обвинија Србија, од каде, според нив, дошле криминалците што го извршиле овој, како и претходните напади оваа недела со рачни бомби врз полициската станица и објектот на општината Звечан.
Српскиот министер за надворешни работи Марко Ѓуриќ денеска изјави дека Србија најостро го осудува нападот на каналот Ибар-Лепенац кај Зубин Поток и посочи дека тоа што режимот на косовскиот премиерот Албин Курти, побрза да покаже со прст кон Србија без докази потенцијално укажува на вмешаност на режимот на Курти, јави дописникот на МИА од Белград.
Ѓуриќ во објава на мрежата Икс, ги повика релевантните меѓународни власти да спроведат темелна и транспарентна истрага со цел да се идентификуваат и да се повикаат на одговорност одговорните за овој чин.
Ј. Ѓ.
Поврзано:
