Меѓународната организација Хјуман рајтс воч (ХРВ) во извештајот објавен денеска нагласува дека Израел убил илјадници Палестинци во Газа со тоа што им ускратил пристап до чиста вода, што според законите е чин на геноцид и истребување.
– Оваа политика, нанесена како дел од масовното убивање на палестинските цивили во Газа, значи дека израелските власти извршиле злосторство против човештвото за истребување, кое е во тек. Оваа политика, исто така, претставува „чин на геноцид“ според Конвенцијата за геноцид од 1948 година, наведува ХРВ.
Израел постојано отфрла какво било обвинение за геноцид, велејќи дека го почитува меѓународното право и има право да се брани по прекуграничен напад на Хамас од Газа на 7 октомври 2023 година, кој ја забрза војната.
Иако извештајот го опишува ускратувањерто на водата како чин на геноцид, тој истакна дека докажувањето на злосторството геноцид врз израелските официјални лица, исто така, ќе бара утврдување на нивната намера.
Изјавите на некои високи израелски функционери беа цитирани како сугерираат дека тие „сакаат да ги уништат Палестинците“, што значи дека ускратувањето пристап до вода „може да претставува злосторство за геноцид“.
„Утврдивме дека израелската влада намерно убива Палестинци во Газа со тоа што им ја прекинува водата што им е потребна за да преживеат“, рече на прес-конференција Лама Факих, директор на Хјуман рајтс воч за Блискиот Исток.
ХРВ е втората голема организација за човекови права за еден месец што го употреби зборот геноцид за да ги опише акциите на Израел во Газа, откако Амнести интернешнал објави извештај во кој заклучува дека Израел извршил геноцид.
Двата извештаи дојдоа само неколку недели откако Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен шеф на одбраната за наводни воени злосторства и злосторства против човештвото. Тие ги негираат обвиненијата.
Конвенцијата за геноцид од 1948 година, го дефинира злосторството геноцид како „акти извршени со намера да се уништи, целосно или делумно, национална, етничка, расна или религиозна група“.
Во извештајот на Хјуман рајтс воч од 184 страници се вели дека израелската влада го прекинала снабдувањето со вода во Газа, ја исклучила електричната енергија и го ограничила горивото, што значи дека сопствените водоводни и санитарни капацитети во Газа не можат да се користат.
– Како резултат на тоа, Палестинците во Газа имаа пристап до само неколку литри вода дневно во многу области, далеку под прагот од 15 литри за преживување, истакнува ХРВ.
Во израелската воена кампања загинаа повеќе од 45.000 Палестинци, се раселени повеќето од 2,3 милиони жители и голем дел од крајбрежната енклава се претвори во урнатини.
