Јужнокорејската полиција денеска соопшти дека извршила претрес во канцелариите на авиокомпанијата „Чеџу Ер“ и аеродромскиот оператор во Муан, како дел од истрагата за авионската несреќа што се случи на 29 декември, а во која загинаа 179 лица. Авионот „Боинг 737-800“ на јужнокорејската авиокомпанија, кој летал од Бангкок до Муан во југозападна Јужна Кореја слета на трупот, се излизга од пистата и експлодира откако удри во ѕид.
Преживеале двајца членови на екипажот кои биле во опашката на авионот.
Полициските истражители ги претресоа канцелариите на аеродромскиот оператор и управата за воздушен сообраќај во Муан и канцеларијата на авиокомпанијата во Сеул, соопшти полицијата на провинцијата Јужна Џеола.
Инспекторите заплениле документи и материјали поврзани со одржувањето на авионите и опремата на аеродромот, изјави претставник на полицијата. Прашањата од експертите за безбедност на воздушниот сообраќај се фокусирани на насипот што се користи за опремата за навигација, за кој велат дека е премногу крут и премногу блиску до крајот на пистата.
Засега не е познато зошто авионот не можел да ја активира опремата за слетување и зошто пилотот побрзал да направи уште еден обид за слетување откако пријавил во контролната кула дека во авионот удрила птица и прогласил тревога.
