Култната македонска музичка група „Фолтин“ денеска и официјално со прес-конференција го означи почетокот на прославата на својот голем јубилеј под мотото „30 години музичка слобода и жива врска со публиката“. Главниот настан на оваа тридецениска приказна започнува вечерва во Скопје со јавна промоција на нивното најново ексклузивно издание.
По неколкумесечна напорна работа во студио, снимање, мастеринг и комплетна подготовка, пред јавноста премиерно се претставува изданието „FOLTIN Live“. Станува збор за дупли албум отпечатен на винил, кој е целосно снимен во живо и кој членовите на бендот симболично го нарекуваат своја „звучна монографија“.
Промоцијата е закажана за вечерва со почеток во 18:00 часот во просториите на „Аудиокултура“ во Скопје, место каде што звукот не само што се пушта, туку се доживува во својата полна моќ. За најстрасните собирaчи на македонска музика, во Скопје веќе се пристигнати дел од првите 150 примероци од лимитираната, рачно нумерирана и потпишана серија на винили, кои ќе бидат достапни за набавка за време на настанот.
Рачно нацртана типографија и илустрации инспирирани од текстовите
Покрај звучното совршенство, албумот носи и уникатен визуелен идентитет за кој се погрижи познатиот македонски дизајнер Зоран Кардула. Според неговите зборови, самата атмосфера од живите настапи и музиката од плочата ја воделе идејата за дизајнот. Финалното креативно решение претставува спој на илустрации од членовите на „Фолтин“ од различни концерти низ годините, колоритно поддржани од специфични бои инспирирани директно од нивните текстови, како и целосно рачно нацртана типографија.
Зад овој обемен аудио-визуелен проект како главни протагонисти се потпишуваат членовите на бендот: Бранислав Николов, Пеце Николовски, Гоце Јованоски, Славчо Јовев и Пеце „Брада“ Трајковски.
Оваа концертна плоча е само првиот проект од серијата активности со кои бендот ќе ги одбележи своите 30 години на сцената. Вечерва започнува и серијата настани преку кои албумот „FOLTIN Live“ ќе биде концертно и промотивно претставен и во други градови низ Македонија, а за сите оние кои нема да успеат да присуствуваат, организаторите најавуваат дополнителни насоки за онлајн резервации и набавка на винилите.
Проектот се реализира во соработка со долгогодишните партнери на бендот, меѓу кои „Bozinovski watches & jewelry“, „Солидус – Финансиско друштво“ и „Audiokultura“.
