Насилството продолжи во Газа во четвртокот и покрај прекинот на огнот објавен во средата навечер, откако канцеларијата на Бенјамин Нетанјаху го одложи одобрувањето на договорот обвинувајќи го Хамас дека се обидува да ги промени условите.
Како што пренесува ТВП, состанокот на израелскиот кабинет закажан за 11 часот по локално време е одложен поради тврдењата дека Хамас барал отстапки во последен момент.
Би-Би-Си објави дека новите услови се однесуваат на ослободување на конкретни затвореници од Хамас.
„Спротивно на експлицитната клаузула која му дава на Израел право на вето за ослободување на масовните убијци кои се симболи на теророт, Хамас бара да се диктира идентитетот на овие терористи“, ја цитира The Jerusalem Post изјавата од канцеларијата на Нетанјаху.
„Премиерот му наложи на преговарачкиот тим да остане цврсто на договорените разбирања и целосно да ги отфрли обидите за изнуда на Хамас во последен момент“, се додава во соопштението.
Ројтерс го цитираше висок функционер на Хамас, Изат ал Ришек, кој рече дека групата останува посветена на условите од прекинот на огнот објавен од посредниците.
Сепак, новинската агенција ја цитираше и канцеларијата на Нетанјаху во соопштението: „Хамас отфрли делови од договорот постигнат со посредниците и Израел во обид да изнуди отстапки во последен момент.
„Израелскиот кабинет нема да се состане додека посредниците не го известат Израел дека Хамас ги прифатил сите елементи од договорот“, се продолжува во соопштението.
„Јерусалим пост“ објави дека договорот за прекин на огнот, со посредство на САД, Египет и Катар, ќе трае 42 дена во првата фаза, а имплементацијата ќе започне два или три дена по неговото потпишување.
Израелскиот дневен весник ги цитираше извештаите од пан-арапската новинска куќа The New Arab дека Хамас нашол „дупка“ во договорот и дека Египет се согласил да го измени документот за да ја затвори дупката.
Висок израелски политички извор за „Јерусалим пост“ изјави дека отстапките се однесуваат на „Коридорот Филаделфи“, појас на земја долж границата меѓу Газа и Египет. Израел тврди дека појасот е рута што се користи за шверц на оружје за Хамас во Газа.
Би-Би-Си ја цитираше агенцијата за цивилна одбрана на Хамас дека во четвртокот објави дека 71 лице биле убиени во израелските напади во Газа од објавувањето на прекинот на огнот.
Подготви: Драган Мишев / Цивил Медиа
