Атлетико Мадрид е целосно подготвен да се соочи со градскиот ривал Реал Мадрид во дербито во Ла Лига в сабота, изјави тренерот на Атлетико – Диего Симеоне.
Реал води во поредокот со 49 бодови, еден повеќе од Атлетико, кој по 22 меча има три бода повеќе од третопласираната Барселона.
Атлетико го совлада Хетафе со 5-0 во Кралскиот куп во вторникот и Симеоне рече дека нивниот фокус сè уште не бил на дербито во саботата.
-Сè уште не сме разговарале за натпреварот. Одлучивме добро да се опоравиме и утре попладне ќе одлучиме каде ќе бидеме на натпреварот, знаејќи дека ни претстои противник со големи карактери, што ги прави исклучително опасни. Со целиот овој контекст, знаејќи со што ќе се соочиме, ќе бидеме подготвени да ја играме играта што сакаме да ја играме, прокоментира денеска Симеоне.
Неодамнешните дербија во Мадрид беа неизвесни, со четири нерешени 1-1 и по две победи за секој тим во лигата во последните четири години.
Сепак, Реал Мадрид нема победа на ниту еден од последните четири натпревари меѓу двата тима.
-Знаеме против кого излегуваме, противник кој ќе започне силно, многу решително. Тие се многу добри со и без топка и ќе мораме да го однесеме натпреварот таму каде што мислиме дека можеме да ги повредиме, прокоментира Симеоне.
Аргентинскиот тренер додаде дека не го одредил составот за саботниот натпревар.
-Замислувам натпревар од 95 или 96 минути во кој треба да бидеме подготвени на се. Се има влијание, од тоа кој почнува до кој го завршува мечот, додаде Симеоне.
