Социјалдемократскиот сојуз на Македонија (СДСМ) ја критикува одлуката на Владата за ограничување на маржите, оценувајќи ја како задоцнета и половична, со недостатоци кои, според нив, нема да донесат вистински ефект врз животниот стандард на граѓаните.
Според СДСМ, замрзнувањето на цените на нивото од 1 февруари не е соодветно решение за справување со скапотијата, бидејќи податоците на Државниот завод за статистика покажуваат дека веќе во јануари имало значителен раст на цените. Од партијата тврдат дека Владата реагирала дури откако цените веќе пораснале, што го оценуваат како уште една манипулација со граѓаните.
„Власта требаше да се врати неколку месеци наназад и како репер да ги земе тогашните цени, а не сегашните, кои веќе се зголемени“, стои во соопштението на СДСМ.
Дополнителна критика е упатена и кон одлуката за ограничување на маржите само за 102 групи на производи. Според СДСМ, наместо делумно решение, треба да се опфатат сите 238 категории на производи за да се почувствува вистинска економска корист за граѓаните.
„Владата на Мицкоски и ДПМНЕ не само што не успева да се справи со економските предизвици, туку работи во корист на големите бизнис интереси, наместо да се грижи за доброто на граѓаните“, велат од партијата.
СДСМ предлага конкретни мерки за стабилизација на цените и намалување на трошоците за живот, кои веќе се поднесени во Собранието по итна постапка. Меѓу нив се:
Намалување на ДДВ за струјата на 5%, што според партијата, ќе доведе до веднаш намалување на сметките за електрична енергија за 13% и просечна заштеда од 400 денари месечно по домаќинство.
Укинување на ДДВ за основните прехранбени производи, што ќе резултира со намалување на цените на над 250 категории на производи и ќе овозможи граѓаните да заштедат до 2.000 денари месечно.
Според СДСМ, целосната примена на предложениот сет мерки и Законот за нефер трговски практики ќе доведе до намалување на цените за 30%.
„Граѓаните заслужуваат конкретна поддршка, а нашите мерки се вистинскиот начин за намалување на цените на храната и на сметките за струја“, порачуваат од партијата.
