На денешната прес-конференција, пратеничката на СДСМ, Сања Лукаревска, ја повика Владата да обезбеди средства за зголемување на минималната плата на 500 евра, обвинувајќи ја за економска нестабилност и влошување на животниот стандард на граѓаните.
Лукаревска истакна дека економијата тоне, инфлацијата изнесува 5%, цените на храната се зголемени за 20%, а индустриското производство е во пад од 1,4%, додека извозот се намалил за 5,9%.
„Ова не се само бројки, ова се човечки животи. Народот осиромашува, а владата не презема ништо. 83.000 работници не ја добиле јануарската плата, што е алармантен податок за состојбата во стопанството“, изјави таа.
Според Лукаревска, владата покажува неспособност и незаинтересираност за економската криза, која, според неа, самата ја предизвикала. Таа потенцираше дека СДСМ има подготвени мерки за зголемување на платите и намалување на трошоците за живот, но дека ВМРО-ДПМНЕ ги одбива предлозите.
СДСМ најавува законско решение
Лукаревска порача дека ако владата не обезбеди средства за поголеми плати, СДСМ ќе поднесе Закон за зголемување на минималната плата.
„Работниците заслужуваат достоинствен живот, а не беда и понижување. Парите од буџетот мора да бидат наменети за граѓаните, а не за привилегирани поединци“, нагласи таа.
СДСМ останува на ставот дека минималната плата од 500 евра е неопходна за граѓаните да се справат со зголемените трошоци за живот.
Недозволиви се нападите на ВМРО-ДПМНЕ врз Синдикатот
Лукаревска рече дека Сојузот на синдикати на Македонија (ССМ) мора да остане независен коректив на политиките и на власта и на опозицијата, без да биде вмешан во политички игри.
„Синдикатот треба јасно и гласно да ги кажува своите барања. Кога владата ја менаџираше кризата, ССМ беше редовно вклучен на состаноците на Економско-социјалниот совет. Имаше континуирана комуникација и средби. Недозволиво е политичките партии да го ставаат ССМ во контекст на блискост со било која партија. Синдикатот има обврска да ги штити работничките права и тоа треба да биде неговата единствена цел, како што е случај во Европа и светот“, истакна Лукаревска.
