Пред зградата на Градското собрание на Белград денеска избувна масовна тепачка меѓу граѓани и припадници на обезбедувањето, откако демонстрантите се обиделе да ја отстранат заштитната ограда. Обезбедувањето реагирало со физичка сила, а ситуацијата брзо ескалирала во жесток судир, јавуваат српски медиуми.
Според видеоснимките, некои од припадниците на обезбедувањето започнале да удираат граѓани, по што тие возвратиле. Тепачката завршила со повлекување на обезбедувањето во кругот на зградата.
Privatni Šapićevo obezbedjenje tuče građane ispred skupštine grada Beograda!!! pic.twitter.com/Ib2we9kh7u
— Miloš Vučković (@Zvezdarko) March 6, 2025
Во Собранието се одржуваше седница на која се расправаше за повеќе предлог-одлуки, вклучувајќи го и ребалансот на буџетите на градските комунални претпријатија. Граѓанската иницијатива „Мост останува“ повика на блокада на седницата, тврдејќи дека единствените легитимни точки на дневниот ред треба да бидат поддршката за студентските протести и мораториум на нетранспарентните градежни проекти.
По завршувањето на седницата, инцидентите продолжија. Полицијата во опрема за разбивање демонстрации беше распоредена пред зградата, а неколку лица се приведени. Ситуацијата дополнително се вжешти кога припадниците на приватното обезбедување се обидоа да излезат од зградата за да му помогнат на својот колега, кој беше испрскан со солзавец. Собраните граѓани се обидоа да го спречат неговото евакуирање со Брза помош, но подоцна им беше дозволено да го однесат во болница.
Министерот за внатрешни работи, Ивица Дачиќ, изјави дека полицијата интервенирала по барање на вработените во Градското собрание и дека не вршела притисок врз граѓаните. „Нашата задача е да го одржуваме јавниот ред и мир“, рече Дачиќ.
