Во критична состојба 45 лица, бројот на починати во трагедијата во Кочани е 59, изјави министерот за внатрешни работи Панче Тошковски.
Тој рече дека правното лице нема лиценца на работа и дека сопственикот на дискотеката при контрола приложувал фалсификувана лиценца.
Министерот истакна дека се констатирани низа неправилности во дискотеката. Немала соодветна лиценца а работела како лесна индустрија. Немало излезни врати за евакуација, во објектот немало хидрантска мрежа и ималo само два ПП апарати. Тошковски вели дека концертот бил одржан на „диво“ – немало договор помеѓу бендот и организаторот.
Приведени се пет лица на територијата на СВР Скопје и СВР Тетово, меѓу кои и поранешен министер, како и 13 лица на подрачјето на СВР Штип од кои 11 се во краткотраен притвор од 48 часа.
Како што истакна министерот, над 22 – 23 лица се осомничени за целиот настан.
Тој нагласи дека МВР не било известено за настанот и во такви ситуации МВР немале обврска да вршат обезбедување на таков настан и објект.
Истакна дека немало пријава до МВР за користење на пиротехнички стредства кои се причина за пожарот, а истите ги донел бендот ДНК.
„Нема да застанеме со процесни дејствија. Констатиравме дека системот во Македонија е корумпиран на ниво што може да кажеме имаме катастрофална состојба на постапување на иннституциите во вакви случаи. Ќе има многу приведени од различни институции вклучуваќи и од МВР. Ќе бидат спроведени темелни контроли. Корупцијата и криминалот нè доведуваат до фаза да ги губиме животите на нашите деца. Или одлучно и системски ќе смени нешто, или оваа држава ќе ја снема“, рече Тошковски.
Ј. Ѓ.
