Потпретседателката на СДСМ, Кристина Костова, денеска на прес-конференција ја критикуваше Владата за зголемувањето на минималната плата за 1.800 денари, нарекувајќи ја одлуката „срамна, понижувачка и неодговорна“.
Според Костова, Владата дозволила екстремно зголемување на цените на основните производи, додека предложеното покачување на платите не е доволно за да ги покрие основните животни трошоци. Таа посочи дека потрошувачката кошница во февруари 2025 година достигнала 63.773 денари, што е за над 100 евра повеќе во споредба со истиот период минатата година.
„Како пресметаа дека 1.800 денари им се доволни на работниците? Граѓаните секојдневно се борат со високи цени, високи сметки, а со мизерни плати. Две минимални плати не се доволни за основните месечни трошоци на едно семејство“, изјави Костова.
Таа ја обвини Владата за „непродуктивни трошења“ и недоволна поддршка за граѓаните.
„Додека граѓаните бираат дали да купат храна или да платат сметки, ДПМНЕ во историски најголемиот буџет не предвиде средства за работниците, но затоа има пари за луксузни трошоци. Но затоа има пари за папаја, манго, лосос, за приватни авиони и непродуктивни трошења на владата и нејзините функционери. За работниците остави трошки и ги остави во сиромаштија. Граѓаните да живета на воздух а владата на манго и папаја. Срамота“, нагласи таа.
Костова истакна дека, за првпат откако е воведена минималната плата, Владата донела одлука за нејзина корекција без консултации со работниците.
„СДСМ покажа дека минималната плата може и мора да се зголемува со соодветни законски решенија. Од 8.000 денари во времето на ДПМНЕ ја зголемивме на 22.567 денари и сега бараме нејзино покачување на 500 евра. Ќе поднесеме закон за тоа“, најави таа, додавајќи дека партијата ќе продолжи да се залага за достоинствени плати и подобар стандард на граѓаните.
