Опсегот на мерката субвенциониран студентски оброк ќе се прошири за нови четири илјади студенти, изјави претседателот на Универзитетското студентско собрание на УКИМ Александар Николовски откако денеска во Собранието беше усвоен заклучок да се поддржи донесување на Предлог-закон за изменување на Законот за субвенциониран студентски оброк, по скратена постапка.
Како што на собраниската седница образложи пратеникот на ВМРО-ДПМНЕ Сергеј Попов, на барање на студентите правото на оваа субвенција се надградува и за оние студенти кои досега не можеле да го остварат т.е. ќе важи и за постдипломци и студенти на интегрирани студии на државните и приватните универзитети, регистрирани индивидуални земјоделци и вработени со приходи до утврдената минимална плата.
Претседателот на студентската организација Николовски апелираше до сите пратеници да гласаат за донесување на измените на законот со цел, како што рече, „да се подигне студентскиот стандард за нови 4000 студенти“.
Потсети дека минатата година дневниот износ на субвенционираниот оброк беше зголемен за 20 денари, односно од 120 на 140 денари, а за оваа година одлучиле да биде зголемен опфатот на студенти.
-За оваа година го зголемуваме опсегот, а за следната академска година ќе биде побарано и зголемување на сумата за сите корисници, со висината на инфлацијата за оваа и следната година, затоа што првично сметавме дека е подобро да се прошири опсегот, а потоа за сите да биде зголемена и сумата, изјави Николовски.
Посочи дека УСС на УКИМ организирало и акција за студентски попусти во локалите низ градот и дека има 30-ина кои нудат оброк за 140 денари или нудат попусти на нивните оброци.
-Со ова веќе не е субвенционирана сума туку и целосно покривање на оброкот, со што целосно ја задоволува сумата. Па сметавме дека ако за 140 денари може веќе да купат некаде оброк, подобро е сега да го зголемиме опсегот за сите да можат за 140 денари да купуваат оброк, а потоа да расте и сумата, рече Николовски.
Предлог-закон за изменување на Законот за субвенциониран студентски оброк е на седница на собраниската Комисија за финансирање и буџет закажана за вечер во 19.30 часот.
На седница на матичната Комисија за образование, наука и спорт, пак, закажана за вечер од 19.15 часот, се шест други предлог-закони од образованието, по скратена постапка: за учебници во основно и средно образование; за основното образование; за стручно образование и обука; за просветната инспекција, за средното образование и Предлог-закон за изменување и дополнување на Законот на Бирото за развој на образованието.
