ДУИ во соопштение до јавноста ја нагласува итната потреба за како што велат, одговорност и обезбедување и почитување на сите стандарди за да се спречат во иднина трагедии како таа во Кочаниво. Оттаму велат дека „за жал, по оваа катастрофа, граѓаните се сведоци на загрижувачко однесување од актуелната влада на ВМРО-ДПМНЕ предводена од премиерот Мицкоски.
Демократската унија за интеграција за неодамнешните апсења, оценува дека станува збор за обид на владата да ја избегне одговорноста и да предизвика меѓуетнички тензии.
„Наместо да преземе брза и решителна акција и да ги повика на одговорност оние кои се вистински виновни, владата се вклучи во активности за бегање од одговорност на актуелните функционери и се оддаде на создавање непотребни етнички тензии,“ соопштуваат од ДУИ.
Партијата обвинува дека „во моментов Мицкоски со неосновано апсење на Албанци се обидува да предизвика меѓуетнички тензии, како параван за неуспесите на владата и како алатка за предизвикување етнички раздор.“
ДУИ исто така ги осудува, како што велат, апсењата на поединци кои „немаат врска со трагедијата“, оценувајќи ги како средство за „оттргнување на вниманието од вистинските виновници.“
„Овие постапки без докази покренати од институциите на Мицкоски, служат за насочено таргетирање на поединци за политички цели,“ се наведува во реакцијата на партијата.
Соопштението го пренесуваме во целост.
„Демократската унија за интеграција (ДУИ) по трагичниот пожар во Кочани, во кој животот го загубија 60 млади лица, ја нагласува итната потреба за одговорност и обезбедување почитување на сите стандарди за да се спречат вакви трагедии во иднина.
За жал, по оваа катастрофа, граѓаните се сведоци на загрижувачко однесување од актуелната влада на ВМРО-ДПМНЕ предводена од премиерот Мицкоски.
Наместо да преземе брза и решителна акција и да ги повика на одговорност оние кои се вистински виновни, владата се вклучи во активности за бегање од одговорност на актуелните функционери и се оддаде на создавање непотребни етнички тензии.
Во моментов Мицкоски со неосновано апсење на албанци се обидува да предизвика меѓуетнички тензии, како параван за неуспесите на владата и како алатка за предизвикување етнички раздор.
ДУИ најостро ги осудува неодамнешните апсења на поединци кои немаат врска со трагедијата, како средство за оттргнување на вниманието од вистинските виновници.
Овие постапки без докази покренати од институциите на Мицкоски, служат за насочено таргетирање на поединци за политички цели.
Очигледно е дека додека се користат поединци како жртвени јагниња, оние на моќни позиции, вклучително актуелни министри и директори, остануваат на слобода и покрај нивната целосна одговорност за оваа трагедија.
Ги повикуваме институциите:
1. Да не работaт по “Законот на Мицкоски”, туку да ја потврдат својата посветеност за почитување на владеењето на правото и заштита на правата на сите граѓани, без разлика на нивната етничка припадност.
2. Да спроведе темелна и транспарентна истрага за трагедијата во Кочани, базирана врз докази, со тоа обезбедувајќи гаранции дека вистински одговорните лица ќе ги сносат последиците, без разлика на нивната политичка определба.
3. Да се фокусира на решавање на легитимните барања на сите погодени од оваа трагедија и на пошироката јавност која бара правда, за што е неопходно да се истражат темелно сите факти кои предизвикале да се случи оваа хаварија која однесе 60 животи, за истото никогаш да не се повтори.
Мицкоски да престане со селективниот пристап и апсења без соодветни докази, да ги ослободи оние кои биле незаконски приведени без доказен материјал или соодветна постапка.
ДУИ останува посветена на правдата, еднаквоста и благосостојбата на сите граѓани и ја повикува меѓународната заедница и локалните граѓански организации да се придружат во застапувањето за правично и праведно решавање на оваа еднострано наметната криза во која вистински одговорните ги водат постапките и со тоа влијание се обидуваат да се изолираат од одговорност.“, се наведува во соопштението од ДУИ.
Со проширената истрага опфатени се 19 лица кои се сомничат за тешки дела против општата сигурност според членот 292, а во врска со член 288 од Кривичниот законик.
Како што претходно објавија повеќе медиуми, приведени се и поранешните министри за економија Ваљон Сарачини и Беким Незири, кадри на ДУИ, како и актуелниот министер без ресор и поранешен директор на Дирекцијата за заштита и спасување (ДЗС), Шабан Салиу, а меѓу уапсените е и актуелниот директор на ДЗС, Џеват Селами, кадар на ВЛЕН.
Ј. Ѓ.
