Европската комисија денеска ја лансира иницијативата „Иновација за локална трансформација“, која има за цел поддршка на иновативните трансформациски политики во околу 200 области ширум Европа, вклучително и во Северна Македонија.
– Оваа иницијатива има за цел да ја подобри нивната конкурентност и да ги подготви за идните предизвици. Со неа се опфатени неколку влади од земјите членки на ЕУ, како и региони, градови и трети држави поврзани со програмата „Хоризонт Европа“, како Украина, Северна Македонија, Турција и Норвешка, соопшти ЕК.
Како што јави дописникот на МИА од Брисел, иницијативата ќе се фокусира на зајакнување на капацитетите на овие области преку мобилизирање на ресурси и изнаоѓање решенија за надминување на клучните предизвици поврзани со транзицијата кон циркуларна економија, подобрување на здравствените системи, прилагодување кон климатските промени и унапредување на дигиталната трансформација.
– Надоградувајќи се на поддршката на Заедничкиот истражувачки центар за политиките за иновации, иницијативата има за цел да ја промовира регионалната соработка и да ја поттикне трансформацијата ширум европските области. Иницијативата, поддржана од Европскиот парламент, придонесува кон целта на ЕУ за насочување на зелената и дигитална транзиција кон изградба на фер, конкурентна и одржлива економија, се потенцира во соопштението.
Според извршната потпретседателка на Европската комисија за чиста, праведна и конкурентна транзиција Тереза Рибера, станува збор за иновативен пристап што ги прифаќа и поддржува различностите.
– Сите можеме да придонесеме за нашиот заеднички просперитет, да ги поттикнеме изворите на креативност и да изградиме поотпорна и одржлива Европа, додаде Рибера.
Извршниот потпретседател за кохезија и реформи Рафаеле Фито, пак, нагласи дека оваа иницијатива на ЕУ има за цела да ги трансформира европските области во двигатели на иновациите и трансформацијата.
– Со поддршка на локалните решенија, можеме да помогнеме во зајакнувањето на регионите, градовите и заедниците да ја подобрат својата конкурентност, да го поттикнат растот и да се подготват за предизвиците на Европа денес и утре, додаде Фито.
