Партијата Слободата доаѓа (ЛЛА) на претседателот на Аргентина Хавиер Милеи победи на локалните избори во Буенос Аирес, откако листата предводена од неговиот портпарол Мануел Адорни освои 30,1 отсто од гласовите, покажуваат официјалните резултати по околу 99 отсто обработени избирачки места.
Второто место на вчерашните избори го освои перонистичката листа Буенос Аирес сега, предводена од Леандро Санторо, со 27,3 отсто од гласовите. Републиканскиот предлог (ПРО), со Силвија Лоспенато на чело на листата, заврши како трет со 15,9 отсто од гласовите, што е најлош резултат за „жолтата партија“ во речиси 20 години доминација во аргентинскиот главен град.
Ова е првпат ПРО на избори да заврши зад перонистите. Излезноста на гласачите беше најниска во историјата на аргентинскиот главен град, бидејќи на избори излегоа 53,2 отсто од 2,5 милиони гласачи со право на глас. Ниската излезност на гласачите беше очекувана поради фактот што локалните избори се одржаа одвоено од националните избори закажани за 26 октомври, но таа бројка беше многу пониска од она што го проценуваа политичките аналитичари, наведува Буенос Аирес Хералд.
ЛЛА обезбеди победа откако се залагаше за спроведување на владините мерки „моторна пила“ во самиот град, слично на она што претседателот Милеи го направи на национално ниво со намалување на даноците и намалување на државното присуство. Милеи, славејќи ги резултатите од изборите во придружба на членовите на неговиот кабинет, порача дека станува збор за „пресвртница за идеите на слободата“.
Изборите за половина од 60-те места во градското собрание се сметаат за прв важен изборен тест за Милеи, кој стапи на должност кон крајот на 2023 година.
