Претседателот на Сојуз на синдикатите на Македонија (ССМ), Слободан Трендафилов, на својот Фејсбук профил објави дека додека платите во јавниот сектор растат, тоа не важи подеднакво за работниците, туку најголемото покачување го добиваат функционерите.
Според одлуката објавена во Службениот весник, платите на функционерите избрани од Владата ќе се зголемат за 13,8%. Коефициентот за пресметка на нивните плати се зголемува од 2,24 на 2,55, што значи дека нивната месечна плата ќе порасне од 92.375 денари на 105.159 денари, односно ќе добијат дополнителни 12.784 денари почнувајќи од 1 јуни 2025 година.
„Ако зголемувањето на платите на работниците кое им следува и кое изнесува 12,6% согласно Општиот колективен договор за јавниот сектор, како и потребата од зголемување на минималната плата на 500 евра и за 100 евра зголемување на останатите плати ќе ја зголеми инфлацијата, тогаш зголемување од 13,8% на платата на функционер веројатно иако така влијае на инфлацијата, но изгледа ја намалува (друго образложение нема)“, вели Трендафилов, кој додава дека секој заслужува покачување, но прво треба да се обрне внимание на работниците кои имаат помали плати и се погодени од растот на животните трошоци.
Трендафилов додава и дека е неприфатливо да има доволно пари за покачување на платите на функционерите, а да нема за обичните работници.
Д. Муратов / Цивил Медиа
