Советот за безбедност на Обединетите нации денеска ќе одржи седница поради израелските воздушни напади врз Иран.
Седницата на 15-члениот Совет е свикана на барање на иранскиот министер за надворешни работи Абас Арагчи, кој во писмо до ОН истакна дека Израел „ги преминал сите црвени линии“ и дека меѓународната заедница не смее да дозволи овие „злосторства да останат неказнети“.
„Иран го потврдува своето право на самоодбрана согласно член 51 од Повелбата на ОН и ќе одговори решително и пропорционално на овие незаконски и кукавички дејствија“, напиша Арагчи.
Член 51 од Повелбата на ОН се однесува на правото на државите за индивидуална или колективна самоодбрана во случај на вооружен напад.
Според израелски извори, рано утрово Израел извршил серија напади врз Иран, таргетирајќи нуклеарни објекти, фабрики за производство на балистички ракети и елиминирајќи неколку воени команданти. Операцијата, според Израел, имала за цел да го спречи Техеран во развојот на нуклеарно оружје.
Арагчи ги окарактеризира нападите како „тешко кршење на суверенитетот и територијалниот интегритет на Иран, како и акти на агресија и воени злосторства“.
Ирански медиуми, кои се повикуваат на неофицијални извори, јавија дека во нападите загинале најмалку 78 луѓе, а 329 се повредени.
