– СДС и Венко Филипче се впуштија во реализација на сценарио за негов спас и за дефокус на македонската јавност. Инцидентот во Советот на Општина Кочани, каде советник на СДС повреди општинска службеничка, не е случаен. Вчерашното насилство на советникот на Венко Филипче е дел од сценарио кое самиот Филипче го има направено пред месец дена во Дубаи на средба со Зоран Заев, соопштуваат од ВМРО-ДПМНЕ.
„Тоа е периодот кога кажавме дека Филипче 6 дена беше тајно во Дубаи, каде очигледно со својот ментор, Заев скувале план како да дефокусираат и да го спасат Венко Филипче.
СДС и Венко Филипче не знаат како да се справуваат со ситуациите, па затоа секогаш кога се во тесно, прибегнуваат кој креирање инциденти и општ хаос.
Откако со лаги и манипулации се обидоа да злоупотребат трагедија за бедни политички поени, сега СДС и Венко Филипче сакаат да направат хаос во Кочани.
Но, тоа нема да им успее. Јавноста јасно гледа дека ова се последни обиди за спас на политичката кариера на Филипче и нема да наседнат на нивните провокации и сценарија, преку насилство и создавање хаос.
На насилството не му е местото во државните институции, посебно во институции како општински совет, каде што советниците се бирани на непосредни избори, директно од граѓаните.
Граѓаните заслужуваат достоинствено претставување од нивните избраници и нивна работа во интерес на општото добро, а не работење во служба на поединци од политиката, во случајов Филипче.
Затоа, бараме итна и неотповиклива оставка од советникот на Венко Филипче во Советот на Општина Кочани, кој не е во служба на граѓаните, туку во служба за реализација на сценариото за негов спас, стокмено во Дубаи.
А, од друга страна, Филипче може да крои планови и сценарија со Заев колку сака, спас му нема, затоа што граѓаните ќе го казнат на избори, а правосудните органи, за сите криминални афери, ќе мора да го процесуираат“, се нагласува во соопштението од ВМРО-ДПМНЕ.
На вчерашната седница на Советот на Општина Кочани се случи сериозен инцидент, при што беше избегната физичка пресметка меѓу членовите на Советот.
Тензичната атмосфера кулминираше по вербална расправија помеѓу советникот Аки Акиов и координаторот на советничката група на ВМРО-ДПМНЕ, Мирче Стојков.
Во текот на инцидентот, со фрлено шише во глава била погодена правничката на општината, Ана Кралева. На местото интервенирала екипа на Министерството за внатрешни работи, а сите инволвирани лица биле повикани во полициска станица за да дадат изјави.
СДСМ го осуди насилството во Советот на Кочани, велат било сценарио на ВМРО-ДПМНЕ
„Социјалдемократскиот сојуз на Македонија најостро го осудува насилството што се случи на седницата на Советот на општина Кочани.
Ги осудуваме и провидните сценарија на ВМРО-ДПМНЕ, кои со провокации и намерно поттикнување тензии се обидуваат да создадат конфликти и нестабилност во Кочани.
Учесници во инцидентот се советник на ВМРО-ДПМНЕ и советник од Ромската партија, а повредена е вработена во општинската администрација – што дополнително ја отсликува сериозноста на овој инцидент.
СДСМ целосно се оградува од постапките на советникот што го предизвика денешиот инцидент, потенцираме дека не станува збор за наш член туку коалициски партнер.
Факт е дека советниците на ВМРО-ДПМНЕ постојано провоцираат за време на седниците на Советот на општина Кочани. Сценариото на неколку седници наназад вклучуваше навреди на етничка, верска и лична основа, погрдни зборови упатени не само кон поединци, туку и кон целата ромска заедница.
Советникот Васе Алексов од ВМРО-ДПМНЕ беше најгласен во навредите и погрдните зборови и тоа го знаат сите советници.
Иако провокациите на советниците на ВМРО-ДПМНЕ беа очигледни, недозволиво е каков било чин на насилство. Насилството не смее да има и мора да биде санкционирано.
Очекуваме надлежните институции целосно да го расчистат случајот и да утврдат одговорност кај сите инволвирани.
На Кочани, на семејствата, на повредените, на починатите, никому ова не му е потребно освен на ВМРО-ДПМНЕ.
На Кочани му е потребна солидарност, стабилност и решенија, а не насилни сценарија инспирирани од политички калкулации на власта“, соопштија од СДСМ.
В.д. градоначалникот на Кочани, Крстевски, со осуда на инцидентот
Во писмено соопштение што го испраќа до јавноста, вршителот на должноста градоначалник на Општина Кочани Венко Крстевски го осудува инцидентот што се случи на 65. седница на Советот на Општина Кочани. Во него се вели:
„Денес повторно видовме како се гази достоинството на јавното служење.
Во сала каде што треба да се носат одлуки за подобар живот на сите граѓани на Кочани, видовме навреди, турканици и насилство. А на дневен ред беа точки што значат напредок: меморандуми за меѓуопштинска соработка што ќе го засилат инспекцискиот надзор и ќе ни помогнат во борбата против корупцијата и криминалот; ребаланс на буџетот за реализација на проекти од интерес на жителите на општината.
Но некој повторно избра опструкција наместо соработка. Избра да создава хаос само за Советот да не функционира.
До кога ќе дозволуваме лични и партиски интереси да ја кочат иднината на Кочани?
Време е за граѓански притисок!
Ве повикувам сите кои верувате во чесна, одговорна и транспарентна работа на институциите – да се придружите, да застанеме заедно за она што е наше – иднината на Кочани!
Најостро го осудувам денешниот инцидент во Советот на Општина Кочани и јасно се гледа дека направив сѐ за да го спречам.
На повредената колешка ѝ посакувам брзо и целосно закрепнување. Никој не смее да биде изложен на ваква ситуација на своето работно место.“, се наведува во соопштението.
Ј. Ѓ.
