Миграциите во Европската Унија минатата година доведоа до рекорден број од 450,4 милиони жители, надоместувајќи го природниот пад четврта година по ред, покажаа податоците што денеска ги објави Евростат.
Од 2012 година, ЕУ бележи повеќе смртни случаи отколку раѓања годишно, со што миграцијата е единствениот фактор за раст на населението.
Овој тренд предупредува на големи демографски предизвици, бидејќи сè постарото население и ниските стапки на фертилитет го доведуваат системот на социјална држава на работ на колапс и до недостиг на работна сила.
Минатата година, бројот на жители на ЕУ се зголеми за 1,07 милиони, со позитивна нето миграција од 2,3 милиони луѓе. Ова го надомести природниот пад на населението од 1,3 милиони, бидејќи бројот на смртни случаи од 4,82 милиони е поголем од бројот на раѓања од 3,56 милиони.
Германија, Франција и Италија и понатаму се најнаселени земји во ЕУ, на кои отпаѓаат 47 отсто од вкупното население на блокот.
Деветнаесет земји-членки во 2024 година забележаа рекорден пораст, а осум од нив забележаа пад на бројот на жители.
Малта имаше најголема стапка на раст од 19 на 1000 луѓе, а потоа следат Ирска (16,3) и Луксембург (14,7).
Меѓу земјите со пад на населението, Летонија стои најлошо (-9,9), потоа Унгарија (-4,7) и Полска и Естонија со по-3,4.
Населението на Унијата порасна од 354,5 милиони во 1960 година, иако стапките на раст значително опаднаа од три милиони годишно во текот на 1960-тите на 0,9 милиони од 2005-2024 година.
– Забележаниот раст на населението може во најголема мера да се припише на засилените миграциски движења по Ковид-19, наведе Евростат. Во сите 27 земји-членки, населението се намали за време на пандемијата на коронавирусот.
Освен тоа, некои европски влади ги заострија граничните контроли поради стравувањата на јавноста од миграции, иако нелегалните преминувања во 2024 година паднаа за 38 отсто и беа најмалку од 2021 година.
Белгија, Полска, Германија и Холандија минатата година воведоа привремени гранични контроли, а ЕУ исто така го заостри системот за миграција за да го намали бројот на нелегални доаѓања и да ја забрза постапката за барање азил.
