Пишува: ГОРАН ВОЛКАНОСКИ
Локални избори- шанса за поправен испит за нашата зрелост како нација и држава.
Мислите дека локалните избори ќе бидат Локални?
Јас не верувам.
Знаете зошто?
Затоа што, за жал немаме нормален амбиент. Немаме нормална состојба, каде што гласачите ќе се изјаснуваат по основ понудите на кандидатите за градоначалници. По основ на понудите за тоа како кандидатите за градоначалник замислуваат дека треба да функционира локалната самоуправа. По основ на понудите за решавање на локалните проблематики.
За жал, според мене 90%,од тие што ќе излезат на гласање ќе гласаат според партиските определби.
За жал, ние не се определивме да одиме по патот кој ќе овозможеше создавање на нормални, демократски, слободни општествени состојби во кои Локалните избори ќе беа Локални, Парламентарните – Парламентарни, Претседателските-Претседателски.
Губитници поради ваквите состојби ќе бидат пред сè, самите граѓани.
Ваквите состојби се резултат на ретроградните процеси кои нè оддалечуваат од патот на изградените демократии во кои нема вакви девијации.
И сега, во ова предизборие. Минативе месеци, па и години, сведоци сме на тенденции на обликување на јавното мнение преку партиско-медиумски инженеринг од страна на владејачката партија во спрега со најголемиот дел од корумпираните медиуми во насока на обликување на перцепцијата во јавноста за тоа кој е “патриот”, а кој “предавник” во оваа држава.
Случувањата околу извештајот на ЕУ за Македонија, кревањето тензии околу договорот со Бугарија, проблематизирањето на сите оние договори кои значеа отворање на патот за наше интегрирање кон најмоќните економски и воени сојузи. Сојузи кој се предуслов за наш прогрес, предуслов за решавање на системските слабости, беа и се, само со една цел – на Локалните избори, граѓаните најмалку да се изјаснуваат за понудите за решавање на локалните проблематики. Повторно да им се замагли здравиот резон, здравата нормална човечка логика.
Повторно им се нудат илузии, чија единствена цел е одржување на политиките кои нè носат во пропаст.
Значи, да сумирам.
Овие Локални избори, може да бидат шанса за граѓаните да влијаат на процесите кои ќе ни дадат можност да се вратиме на колосекот на прогресот. Секако, доколку резултатите на Локалните избори покажат такви стремежи кај граѓаните.
Дали ќе имаме Локални избори како поправен испит за нашата зрелост?
Дали ќе преовлада разумот и индивидуалната одговорност на секој поединец, ќе покажат резултатите на овие Локални избори, кои, можеби, овој пат и не треба да се само локални.
Секако доколку граѓаните разберат дека единствено на тој начин ќе се изборат за шанса за себе и за своето семејство, а не за политичарите.
Со други зборови.
Имате шанса, Локалните избори да бидат орудие во вашите раце со кое ќе ја срушите браната на вашиот прогрес!
