Американскиот претседател Доналд Трамп вчера одржа состанок за војната во Газа, на кој присуствуваа поранешниот британски премиер Тони Блер и поранешниот негов претставник за Блискиот Исток, Џаред Кушнер, изјави висок функционер на Белата куќа.
Трамп, високи функционери на Белата куќа, Блер и Кушнер разговараа за сите аспекти на проблемот со Газа, вклучувајќи ја и доставата на храна, кризата со заложниците, повоените планови и други прашања, изјави функционерот, додавајќи дека станува збор за „едноставен политички состанок“ од типот што Трамп и неговиот тим често го одржуваат.
Кушнер, сопруг на ќерката на Трамп, Иванка, беше клучен советник на Белата куќа за блискоисточни прашања во првиот мандат на Трамп. Блер, кој беше британски премиер за време на војната во Ирак во 2003 година, е исто така активен во прашањата на Блискиот Исток.
Специјалниот претставник на САД, Стив Виткоф, го објави состанокот во „Специјалниот извештај со Брет Бајер“ на Фокс њуз.
„Составуваме многу сеопфатен план, и многу луѓе ќе видат колку е робустен и добронамерен и ги одразува хуманитарните мотиви на претседателот Трамп“, рече Виткоф.
Трамп во својата изборна кампања минатата година вети дека брзо ќе ја заврши војната во Газа, но решението е неизвесно седум месеци од почетокот на неговиот втор мандат.
Вториот мандат започна со примирје кое траеше два месеци, сè до израелските напади на 18 март, во кои беа убиени околу 400 Палестинци. Неодамна, светот беше шокиран од глетката на гладни Палестинци, вклучувајќи и деца, а Израел стана цел на критики за влошувањето на условите во Газа.
„Претседателот Трамп јасно стави до знаење дека сака крај на војната и дека сака мир и просперитет за сите во регионот. Белата куќа во моментов нема дополнителни информации да сподели за состанокот“, рече друг функционер на Белата куќа.
