Израелскиот премиер Бенјамин Нетанјаху го повика Катар да ги протера претставниците на палестинската милитантна група Хамас, еден ден по нападот врз раководството на исламската организација во Доха.
Нетанјаху рече дека нападите биле изведени против планерите на масакрите од 7 октомври 2023 во Израел, кои ја предизвикаа војната во Газа.
– Им велам на Катар и на сите нации што засолнуваат терористи: или ќе ги протерате, или ќе ги изведете пред правдата. Затоа што ако не го направите тоа, ние ќе го сториме, рече Нетанјаху.
Израелскиот премиер дополнително го обвини Катар дека им обезбедува на лидерите на Хамас безбедно прибежиште, финансирање и луксузни вили.
Катарското Министерство за надворешни работи ги осуди „неодговорните изјави“ на Нетанјаху.
Министерството за надворешни работи во Доха ги нарече коментарите на Нетанјаху „експлицитни закани за идни повреди на државниот суверенитет“ и ги опиша како „срамен обид“ да се оправда „кукавичкиот напад“ на Израел во катарскиот главен град во вторникот.
Израелската војска уби шест лица во напади во станбен кварт во Доха во вторникот, што го налути Катар и предизвика ретка критика од американскиот претседател Доналд Трамп.
Меѓу жртвите бил и синот на Халил ал-Хаја, највлијателната личност на движењето во странство, како и шефот на неговиот на кабинет. Ал-Хаја, кој ја предводи делегацијата на Хамас во преговорите за прекин на огнот, преживеал, соопшти групата.
Нападот предизвика меѓународни осуди од арапските држави, Кина и европските лидери.
Но Израел ја зацврсти својата позиција, при што министерот за одбрана Исраел Кац вчера на Х напиша дека „политиката за безбедност на земјата е јасна“, пренесе ДПА.
– Долгата рака на Израел ќе делува против своите непријатели насекаде. Нема место каде што можат да се кријат, напиша тој.
Кац повторно му се закани на Хамас со уништување и предупреди дека Појасот Газа ќе биде разурнат доколку милитантите не ги прифатат условите на Израел за завршување на војната.
Израел пред сè бара ослободување на сите заложници и разоружување на Хамас.
Катар, заедно со Египет и САД, речиси две години посредува помеѓу Израел и Хамас во конфликтот во Газа. Преговорите за прекин на огнот се во застој со месеци.
