НАСА објави дека бројот на потврдени егзопланети официјално ја надмина бројката од 6.000, нешто повеќе од три децении по почетокот на систематското истражување на светови надвор од нашиот Сончев систем. За споредба, пред само три години беа регистрирани 5.000 егзопланети, што укажува на забрзаното темпо на откривање.
„Влегуваме во следното големо поглавје на истражувањето — светови надвор од нашата имагинација,“ се вели во видео на НАСА посветено на јубилејот. „Да бараме планети што би можеле да поддржуваат живот, да ги најдеме нашите космички соседи и да нè потсетиме дека универзумот сè уште крие светови што чекаат да бидат откриени.“
Овој историски момент се совпадна со годишнината на откривањето на првата егзопланета околу ѕвезда слична на нашето Сонце — 51 Pegasi b, детектирана на 6 октомври 1995 година од астрономите Мишел Мајор и Дидие Кело.
Во соопштението, НАСА нагласи дека бројот на планетите се ажурира постојано од научници ширум светот, па затоа не може да се посочи „точната“ шестилјадита егзопланета. Во моментов, вкупната бројка е 6.007, а меѓу најновите откритија е KMT-2023-BLG-1896L b, планета слична на Нептун со маса околу 16 пати поголема од Земјината.
Според податоците на НАСА, досега се потврдени:
2.035 планети слични на Нептун и Уран,
1.984 гасни џинови (слични на Јупитер),
1.761 „супер-Земја“,
700 терестријални (карпести) планети,
и седум планети со „непознат“ тип.
„Секој различен вид планета што ја откриваме ни дава информации за условите под кои настануваат светови и, на крајот, колку се чести планетите слични на Земјата,“ изјави Даун Џелино, раководител на Програмата за истражување на егзопланети при Лабораторијата за млазен погон на НАСА. „Ако сакаме да дознаеме дали сме сами во универзумот, сето ова знаење е суштинско.“
И покрај огромниот број досега пронајдени светови, во видеото на НАСА беше подвлечено и едно клучно прашање: „Постои една што сè уште не сме ја пронашле — планета сосема слична на нашата. Барем, не уште“.
Редакција Фронтлајн
