Британската министерка за надворешни работи Ивет Купер вели дека го предупредила Израел да не анектира делови од Западниот Брег како одмазда за признавањето на палестинската државност од страна на Велика Британија.
Купер зборуваше за Би-Би-Си пред да присуствува на конференција во понеделник во ОН во Њујорк, каде што Франција и други европски држави треба да дадат слична најава.
Во она што беше значајна промена во политиката, премиерот Сер Кир Стармер го објави признавањето на палестинска држава од страна на Велика Британија во недела, заедно со Канада, Австралија и Португалија.
На прашањето од Би-Би-Си дали е загрижена дека Израел ќе ја искористи оваа декларација како изговор за анексија на делови од Западниот Брег, Купер рече дека јасно му ставила до знаење на својот израелски колега дека тој и неговата влада не смеат да го сторат тоа.
Таа посочи дека екстремистите од двете страни се обидуваат да се откажат од секоја перспектива за решение со две држави, кое Велика Британија има морална обврска да го оживее.
Шефицата на британската дипломатија не кажа кога Генералниот конзулат на Велика Британија во Источен Ерусалим ќе стане целосна амбасада, велејќи дека тоа ќе продолжи додека не започне дипломатскиот процес со Палестинската самоуправа.
Израелскиот премиер Бенјамин Нетанјаху ги осуди потезите, велејќи дека тие даваат „огромна награда за тероризмот“.
Д. Мишев / Цивил Медиа
