Оскаровката Анџелина Џоли изјави дека „не ја препознава својата земја“ поради заканите за слободата на говорот во САД, само неколку дена по контроверзната одлука на ABC и „Дизни“ да го суспендираат Џими Кимел.
„Го сакам моето семејство, моите пријатели и мојата земја, но во овој момент не ја препознавам,“ рече Џоли на филмскиот фестивал во Сан Себастијан во Шпанија. „Мојот светоглед е еднаков, обединет и интернационален. Сè што некаде го ограничува личното изразување и слободите – е многу опасно.“
Актерката предупреди дека „живееме во многу тешки времиња“ и дека секој збор има тежина.
Нејзините коментари дојдоа по суспензијата на „Jimmy Kimmel Live!“ од страна на ABC, телевизија во сопственост на „Дизни“. Одлуката уследи по критики од претседателот на Федералната комисија за комуникации (FCC), Брендан Кар, за изјавите на Кимел околу убиството на десничарскиот активист Чарли Кирк.
Суспензијата предизвика лавина реакции во Холивуд. Меѓу најгласните беа ѕвездите на „Дизни“ – Педро Паскал, Оливија Родриго и Марк Рафало.
„Бранете ја слободата на говор. Бранете ја демократијата,“ напиша Паскал на Инстаграм.
Рафало, пак, предупреди дека „Дизни ќе изгуби уште повеќе ако трајно го укине шоуто на Кимел“ и ја спореди ситуацијата со растечка авторитарна закана: „Тоа е владата што ја задушува слободата на говор, а не соседите или социјалните мрежи.“
Оливија Родриго исто така се изјасни: „Многу сум вознемирена од ова очигледно цензурирање и злоупотреба на моќта.“
На бојкот повика и Татјана Маслани („She-Hulk“), која ги охрабри своите следбеници да ги откажат претплатите на Disney+. Сценаристот Дејмон Линделоф („Lost“) најави дека нема да работи со „Дизни“ ако Кимел не се врати.
И сценаристот Дан Гилрој, добитник на Еми за „Andor“, предупреди на паралели со сценарија на „фашистичко преземање“: „Дизни го суспендираше Џими Кимел затоа што кажа што мисли.“
Редакција Фронтлајн
