Мониторинг тимот на ЦИВИЛ констатира повеќе случаи на злоупотреба на деца и малолетници за време на предизборната кампања од речиси сите кандидати во трката за градоначалник. Иако (пред)изборната кампања треба да се води одвоено од институционалните надлежности, дел од кандидатите за градоначалници на ВМРО-ДПМНЕ, ДУИ, ВЛЕН и СДСМ и останатите партии ги користат своите функции за партиска промоција – на штета на децата.
Во изминатиот период кандидатите за градоначалници беа забележани на настани како отворање детски градинки, воведување бесплатни ескурзии и оброци за ученици, како и промоции на новоизградени игралишта. Настаните кои формално се во надлежност на општините или државните институции, кандидатите ги претвораат во дел од својата кампања, објавувајќи фотографии и видеа со присутни деца.
Ќе наведеме само неколку примери:
Градоначалникот на Кисела Вода и кандидат за градоначалник на Град Скопје од ВМРО-ДПМНЕ, Орце Ѓорѓиевски во неколку наврати ги злоупотреби децата за своја партиска промоција.
Ѓорѓиевски присуствуваше на Меморијалниот турнир ,,Бранко Ѓуровски” во Припор, на фудбалскиот терен Никола Саздовски – Саздо, чиј живот прерано беше прекинат поради убиство. Тој вети дека ако победи на локалните избори, од следната година Град Скопје ќе биде генерален покровител на овој настан.
Во промотивното видео на градоначалникот на Ѓорче Петров, Александар Стојкоски од ВМРО-ДПМНЕ, кој ќе трча за уште еден мандат, има мало дете кое покажува три прста (Вардарска, Пиринса и Егејска).
Исто така и градоначалникот на Центар, Горан Герасимовски, кој ке ја бара довербата на граѓаните уште еден мандат, во неколку наврати во неговите промотивни партиски видеа има деца.
Кандидатот за градоначалник на општина Чаир, актуелниот вицепремиер Изет Меџити од ВЛЕН во неколку наврати во неговите промотивни содржини има деца.
И противкандидатот за Чаир, Бујар Османи од ДУИ исто така во неговата промотивна кампања користи деца.
ЦИВИЛ смета дека ова претставува двојна злоупотреба, најпрво на јавната функција, а потоа и на децата кои, иако не смеат да бидат дел од политички активности, се појавуваат во партиски објави.
Политичката злоупотреба на деца е строго забранета со закон! Член 12, став 4 од Законот за заштита на децата јасно утврдува: „Се забранува злоупотреба на децата поради политичко или верско организирање и дејствување“.
ЦИВИЛ повторно апелира до институциите, партиите, медиумите и родителите: веднаш да престане вовлекувањето на децата во политиката. Институциите мора да реагираат со решителни санкции против сите кои ќе се обидат да ги користат децата за свои политички цели.
Заштитата на децата е законска обврска, а злоупотребата мора да престане – веднаш!
Преземено: Цивил Медиа
