Сѐ повеќе јавни личности и жени во политиката, модата и културата се појавуваат со долга коса – тренд што многумина веќе го нарекуваат „епоха на Рапунзел“, пишува Њујорк Тајмс.
Од црвениот тепих до политичката сцена
На премиерата на новиот филм на „Gucci“ во Милано, Деми Мур блесна со нејзините препознатливи долги темни локни. На државниот банкет во Британија, и Меланија Трамп и Кетрин, принцезата од Велс, се појавија со пуштена долга коса. Долгата коса е веќе заштитен знак и на многу жени од кругот на Доналд Трамп, како Кристи Ноем, Каролина Левит и Лара Трамп.
Личен избор и симболика
Мишел Обама, пак, по заминувањето од Белата куќа, го замени краткиот боб со долги плетенки, што многумина го толкуваат како декларација на слобода и независност. „Жените порано беа условувани дека со возраста треба да ја скратат косата. Тоа денес е сменето“, вели Линда Велс, уредничка на Air Mail Look.
„Rich girl’s hair“ – статус и нега
Според експертите, долга и здрава коса бара здравје и финансиски средства за одржување. Затоа некои стилисти го нарекуваат овој изглед „коса на богата девојка“. Со возраста, особено по менопаузата, косата станува потенка и посува, па многу жени користат серуми, суплементи и скапи третмани.
Тренд или културна промена?
Историски, долгата коса често се поврзувала со младост, женственост и плодност, а кратењето било знак на зрелост и модерност. Денес, изборот на долга коса е и форма на бунт против старите стереотипи, но и дел од т.н. „tradwife“ естетика – конзервативен изглед кој го нагласува традиционалното женско.
Со оглед на популарноста и инвестицијата во третмани за нејзино одржување, експертите сметаат дека оваа „ренесанса на долгата коса“ нема наскоро да заврши.
Редакција Фронтлајн
