Во Еуро Фокус на ТВ Телма, на забелешка од професорот Гордан Калајџиев дека Владата нема контролни механизми за справување со кризата, Марјан Забрчанец одговори дека доаѓа од Влада која е демократска и нема намера да ускратува слободи, туку има намера да го штити здравјето на граѓаните.
Забрчанец потенцира дека оваа Влада овие три години покажа дека е многу отворена и транспарентна и која воведе системи за транспарентоност кои функционираат и во вонредна состојба и додаде дека сите мерки за спречување на ширењето на вирусот се воведуваат постепено и целта на мерките не е да го забрани движењето и да ограничува слободи, туку да го спречи ширењето на вирусот, а секако постојат и користиме алтернативни методи на функционирање на целото општество.
Во техничката влада, истакна Забрчанец, имаме и претставници на опозицијата која е контролен механизам, имаме гласни, силни и активни медиуми кои ја следат работата на владата, имаме будна граѓанска јавност исто како што беше и пред појавата на вирусот како и отворени и активни социјални мрежи.
Забрчанец истакна дека за жал Владата нема моќ да го управува работењето или активирањето на парламентот, па од тука мора да дејствува со уредби со сила на закон за да ги спроведува мерките.
„Вонредна состојба е воведена согласно закон и не е воведена да органичува мерки и права, ниту пак правата беа ограничени по автоматизам откако се активираше вонредната состојба, туку одредени ограничувања постепено се воведуваа со цел спречување на ширење на вирусот и јас сум уверен дека скоро доаѓа период кога ќе дојде и до олабавување на мерките.“, потенцира националниот координатор за стратегиски комуникации Марјан Забрчанец во емисијата Еуро Фокус на ТВ Телма.