Долгометражниот филм „Ритам на животот“, плод на соработката на продукциски куќи од неколку земји, меѓу кои и „Круг филм“ од Скопје, освои три награди на 66 Филмски фестивал во Солун, каде што беше и премиерно прикажан, јави дописничката на МИА од Атина.
Филмот доби две награди од публиката во категориите „Грчки филм“ и „Meet the Neighbors“, како и наградата „Crew United“.
Главен продуцент на „Ритам на животот“ е грчката продукциска куќа „Соул Продукција“, а копродуценти се и Дејан Крајчевски од македонската „Круг филм“, како и продукциски куќи од Бугарија, Кипар Црна Гора и Франција.
Филмот ја раскажува приказната за младата Лена, 20-годишна девојка која живее во Атина со семејството, работи во локален супермаркет, но поради сиромашниот живот секојдневието и е исполнето со напнатост и сака да започне свој живот, но сѐ ќе се смени кога ќе добие отказ, истовремено дознавајќи дека е бремена.
Режисерката и косценаристка Америса Баста, минатата седмица во пресрет на премиерата на филмот на фестивалот, во разговор со дописничката на МИА од Атина посочи дека темите што ги анализира „Ритам на животот“, „се заеднички за сите балкански земји“.
Премиерата беше во натпреварувачкиот дел „Meet the Neighbors“, а Баста изрази задоволство што филмот учествуваше токму во овој дел, бидејќи, како што рече, „самиот филм е создаден од земји кои се соседи, копродукција од неколку земји, повеќето се балкански земји Грција, Северна Македонија, Бугарија, Црна гора, како и Кипар и Франција“.
Во однос на наградите, минатата седмица истакна дека „секогаш се добредојдени“, но она што за целиот тим ќе биде најголема награда е да „биде претставен пред публиката и да допре до срцата на гледачите“.
Снимањето започна во август 2023 година, тогаш МИА присуствуваше на еден од сетовите во центарот на Атина, а режисерката и косценаристка тогаш рече дека нивната желба е премиерата да биде на некој голем фестивал, како пример споменувајќи го Филмскиот фестивал во Солун, а сега две години подоцна, токму таму „Ритам на животот“ беше првпат прикажан пред публиката, освојувајќи три награди.
Сценариото на „Ритам на животот“ е на Димитрис Накос и Америса Баста, која воедно е и режисерка.
Во главната улога, во улогата на Лена е младата грчка актерка Елина Циорбаѕи, а кастингот е составен од млади и надежни актери, но и постари и веќе искусни актери од Грција и од Албанија.
Филмот е финансиски поддржан од Филмските центри на Грција, Црна Гора и Кипар, како и од Агенцијата за филм на Република Северна Македонија.
