На конкурсот за Вториот меѓународен фестивал на кратoк филм „ФИЛМАЈ 2020“, што заврши на 5 април, пристигнаа вкупно 2.017 филма од 112 држави, меѓу кои и 15 од земјава, информира Фото-кино клубот “Козјак” од Куманово.
„Значајната бројност на пријавени учесници е благодарение на тоа што пријавувањето беше преку платформата FilmFreeway, која овозможува ефикасно поврзување и вмрежување на филмски творци и фестивалски организатори. За споредба, на првото издание на фестивалот лани пристигнаа 50 пријави, а учесниците се пријавуваа со пополнување на директен онлајн-формулар“, се наведува во соопштението.
Првичен план беше победниците за „ФИЛМАЈ 2020“ да бидат соопштени до 5 мај 2020 година, но согласно тековните услови и важечки препораки за јавно здравје, објавувањето на резултати од конкурсот, според организаторите, најверојатно ќе биде во период мај-септември.
Овогодишното жири на Фестивалот е во состав Ана Јакимска, филмски режисер и сценарист, Златко Ѓелески, писател и културен критичар и Глигор Максимовски, фотограф и член на Фото-кино клубот „Козјак“. Жирито ќе одлучи за доделување на три награди: за најдобра режија „Лазар Ѓорѓевиќ“, за најдобра фотографија/кинематографија „Радислав Ристевски“ и за најдобра приказна/сценарио.
Физичката фестивалска манифестација со присуство на публика во сала се планира кога за тоа ќе биде безбедносно и здравствено целосно прифатливо, во безгрижни денови кои ќе следат по соопштување на резултатите, се додава во соопштението.
