Во катастрофален пожар што зафати голем станбен комплекс во Хонг Конг, загинаа најмалку 44 лица, соопштија локалните власти, додека противпожарните и спасувачките екипи и понатаму се борат со последиците од трагедијата. Според последните информации, 40 лица починале на самото место, а уште четири подоцна им подлегнале на повредите во болница.
Покрај жртвите, најмалку 45 лица се наоѓаат во критична состојба, додека судбината на 279 лица засега е непозната. Спасувачките служби започнаа детална претрага на неколку висококатници во комплексот, стравувајќи дека под урнатините и во изгорените станови може да има уште жртви.
Повеќе од 900 жители беа итно евакуирани од зафатениот дел на комплексот и сместени во привремени прифатни центри. Локалните власти информираат дека обезбедуваат медицинска и психолошка помош за преживеаните, додека истовремено се организира згрижување на оние што останале без покрив над глава.
Полицијата потврди дека уапсила двајца директори и еден консултант на градежна компанија, под сомнение за убиство од небрежност. Во првичната истрага, на местото на несреќата биле пронајдени стиропорски плочи и други, како што се наведува, неквалитетни градежни материјали, за кои постои сомнеж дека придонеле за брзото ширење на пожарот.
Противпожарните служби соопштија дека огнот е ставен под контрола во четири од небодерите, но целосното гаснење ќе потрае уште најмалку еден ден. Гаснењето било дополнително отежнато поради ноќните услови, високите температури во зградите и екстремно загреаните горни катови, што ја зголемило опасноста за екипите на терен.
Истрагата за причините за пожарот продолжува, а локалните власти најавија дека сите одговорни ќе сносат кривична одговорност доколку се утврди пропуст во безбедносните стандарди и градежната изведба.
