Неколку дена по гламурозното финале на изборот за Мис Универзум, светот на изборите за убавина повторно е потресен од сериозен скандал. Граѓанскиот суд во јужен Бангкок издаде налог за апсење на Ен Јакрајутатип, позната трансродна тајландска претприемачка и ко-сопственичка на организацијата Мис Универзум, поради сомнежи за измама, јавуваат меѓународните медиуми.
Правниот спор, кој деновиве доби нова драматична димензија, има корени уште од 2024 година. Како што произлегува од судската документација, истакнат тајландски пластичен хирург ја обвинил Јакрајутатип дека го довела во заблуда, убедувајќи го да инвестира во нејзината компанија JKN Global Group, иако, според обвинението, таа била свесна дека нема да може да ги врати средствата во договорениот рок. Во судските списи се наведува дека инвеститорот бил повикан на вложување и покрај тоа што, наводно, обвинетата била запозната со финансиската немоќ на компанијата.
Јакрајутатип формално се соочила со обвинение уште во 2023 година и била пуштена да се брани од слобода со кауција. Случајот со месеци тапкал во место, но на, 26 ноември, требало да биде донесена клучна судска одлука. Сепак, таа не се појавила на закажаното рочиште, ниту го известила судот за причините за отсуството.
Судот овој потег го оценил како сериозен пропуст и ја прогласил Јакрајутатип за можна бегалка, по што автоматски бил издаден и налог за нејзино апсење. Дел од локалните медиуми веќе шпекулираат дека таа го напуштила Тајланд и отпатувала во Мексико.
Иронијата е уште поголема ако се земе предвид дека токму овој месец Мексико славеше победа на својата нова Мис Универзум, Фатима Бош, која на 20 ноември беше крунисана токму во Бангкок.
Овогодинешното издание на Мис Универзум е обележано со низа контроверзии. Веднаш по финалната вечер, неколку натпреварувачки јавно тврдеа дека натпреварот бил наместен и дека однапред било познато кои учеснички ќе се пласираат во Топ 10. Дополнителни сомнежи во регуларноста внесе и оставката на поранешен судија на изборот, Омар Харфуч, кој изнесе тешки обвинувања за процесот на селекција.
Харфуч тврди дека преку социјалните мрежи дознал оти бил формиран неформален, импровизиран жири кој, надвор од официјалните протоколи, одбрал 30 полуфиналистки меѓу над 120 кандидатки. Според неговите изјави, меѓу членовите на таа група имало и лица со можен судир на интереси, што дополнително ја нарушило транспарентноста и кредибилитетот на натпреварот.
Истражните и судските постапки продолжуваат, а скандалот отвора сериозни прашања за функционирањето на една од најпрепознатливите светски манифестации за убавина.
