– Притисокот за смена на Јавниот обвинител е дел од сценариото на ДПМНЕ и Мицкоски за целосно преземање на Обвинителството и Судството. Обвинител под контрола на Мицкоски и ДПМНЕ. Судии под контрола на Мицкоски и ДПМНЕ. Целосна окупација и партизација на судството, враќање на „тефтерчињата“, погребување на правдата,, ,реагира опозициската СДСМ со соопштение.
„Сопруга на градоначалник од ВМРО-ДПМНЕ беше назначена за член на Судскиот совет, поставија партиски човек во Советот за јавни обвинители. Исто како во времето на Никола Груевски и по истото сценарио што Вучиќ го спроведува во Србија. Токму денеска во собранието на Србија започна расправа за реформи во Уставниот суд, исто како кај нас, и наместо реформска агенда се поставуваат инсталации на власта. Сè е диригирано и синхронизирано. Copy-paste. На власта во Македонија ѝ гори под нозе. Секој ден Антикорупцискиот тим на СДСМ (АКТ) објавува корупциски скандали – како преку наместени тендери се пумпаат милиони евра од џебовите на граѓаните. А од власта – никаква реакција! Сè е поклопено. Политички прогон, измислени кривични пријави, лажни вести, манупулации, злоупотреби на институциите, партизација. Ја пуштија дури и Катица Јанева, за да им служи како алатка во политичка кампања.
Режим 2.0.
Нема да ви помине! Народот ве чека за да ви каже крај.
Нема да се спасите! Сите ќе одговарате!“, истакнуваат од СДСМ.
Државниот јавен обвинител Љупчо Коцевски денеска соопшти дека поднел неотповиклива оставка на функцијата.
Коцевски на прес-конференцијата во ЈОРМС, го оцени како политичка одлука предлогот за негово разрешување што треба да се разгледува на денешната собарниска седница.
Кажа дека од функцијатра што ја вршел помалку од две години „заминува со гордо крената глава, но и со разочараност поради очигледното непочитување на принципите врз кои почива правната држава“. Доказ за тоа, како што наведе, е тоа што дури денеска во 10 часот, еден час пред закажаната седница за негово разрешување, му била доставена поканата за присуство, а не му бил доставен ниту предлогот за разрешување.
