Опозициската СДСМ обвини дека пратениците на ДПМНЕ спречиле поднесување и расправа за предлог-резолуцијата што ја подготвила партијата, оценувајќи дека станува збор за избегнување јавна дебата за прашање од национален интерес.
„Резолуцијата на СДСМ не беше предадена во Собранието затоа што ВМРО-ДПМНЕ не сакаше да прифати ниту да се разговара, ниту да се поднесе“, соопштија од партијата, додавајќи дека наместо дебата, пратениците на владејачкото мнозинство се заканувале со тужби.
Од СДСМ тврдат дека не била дозволена дискусија во законодавниот дом, иако, како што наведуваат, токму Собранието е местото каде избраните претставници на граѓаните треба да ги отвораат ваквите прашања.
„Не сакаа да се отвори дискусија во македонското Собрание, меѓу претставниците на народот – пратениците на кои граѓаните им дале мандат да ги застапуваат пред највисокиот орган на државата“, се вели во соопштението.
Партијата посочува дека бил даден предлог темата да се префрли на општинско ниво, што, според нив, е институционално несоодветно. „Прво предложија темата да се префрли на општините, кои немаат никаква надлежност за вакво национално прашање“, наведуваат од СДСМ.
СДСМ тврди дека од самиот почеток настапила транспарентно, дека резолуцијата била јавно објавена и дека со денови повикувале таа да биде заеднички поднесена и потпишана. „Граѓаните ја видоа нашата Резолуција, јавно ја објавивме и со денови повикувавме заеднички да ја поднесеме и да ја потпишеме“, се наведува во реакцијата.
Како последица на, како што велат, недозволување расправа и избегнување одговори, пратениците на СДСМ ја напуштиле собраниската седница. „Не ни дозволија да зборуваме за нашата предлог-Резолуција, премиерот и министрите побегнаа од пратеничките прашања, побегнаа од вистината и од дебата за Резолуцијата“, наведуваат од партијата.
Од СДСМ дополнуваат дека нема да учествуваат во, како што ја квалификуваат, „политика на избегнување одговорност“, и најавуваат продолжување на политичката борба по ова прашање.
„Со денови зборуваме за ова. Прават сè само за да ја сокријат вистината. А вистината е дека не сакаат да ја потпишат Резолуцијата и подготвуваат своја контра-резолуција“, се вели во соопштението.
Од партијата порачуваат дека темата ќе остане дел од нивната политичка агенда и во наредниот период.
