Преносот на доделувањето на наградите на Американската филмска академија – Оскарите – од 2029 година повеќе нема да се емитува на телевизијата ABC, туку ќе се пренесува ексклузивно на YouTube, откако Академијата за филмски уметности и науки склучи повеќегодишен договор со платформата во сопственост на Google.
Како што пренесува NBC News, договорот ќе започне со 101. церемонија на доделување на Оскарите во 2029 година и ќе важи до 2033 година.
„Возбудени сме што склучуваме глобално, повеќегодишно партнерство со YouTube, кој ќе стане идниот дом на Оскарите и на целокупната програма на Академијата во текот на годината“, изјавија извршниот директор на Академијата Бил Крамер и претседателката Линет Хауел Тејлор во заедничко соопштение.
Тие истакнуваат дека Академијата е меѓународна организација и дека партнерството ќе овозможи значително проширување на пристапот до нејзините содржини за глобалната публика, што, како што велат, ќе биде од корист и за членовите на Академијата и за филмската индустрија во целина.
Телевизискиот пренос на Оскарите се емитуваше во живо на ABC уште од 1970-тите, но гледаноста на церемонијата со години е во опаѓање. Според NBC News, врвот е забележан во 1998 година, кога филмот Титаник освои 11 награди и привлече околу 55 милиони гледачи.
Најновиот телевизиски пренос привлече речиси 20 милиони гледачи, што претставува благо зголемување во однос на годините за време на пандемијата, но и понатаму е далеку од бројките што Оскарите ги имаа во периодот на нивната најголема културна и комерцијална моќ.
Извршниот директор на YouTube, Нил Мохан, изјави дека Оскарите се една од клучните културни институции што го слават раскажувањето приказни и уметноста.
„Партнерството со Академијата ќе ја донесе оваа прослава на уметноста и забавата до гледачите ширум светот, ќе инспирира нова генерација креативци и љубители на филмот, а истовремено ќе остане верна на наследството на Оскарите“, порача Мохан.
Според најавите, целата церемонија, вклучително и преносот од црвениот тепих и содржините „зад сцената“, ќе биде достапна бесплатно во живо ширум светот на YouTube, како и за претплатниците на YouTube TV во Соединетите Американски Држави.
Редакција Фронтлајн
