Администрацијата на претседателот на САД, Доналд Трамп, започна со повлекување на околу 30 кариерни дипломати од амбасадорски и други високи позиции во американските дипломатски претставништва ширум светот, меѓу кои е и амбасадорката во Северна Македонија, Анџела Агелер.
Како што пренесува Бета, повикувајќи се на Асошиејтед прес, мерката е дел од пошироките напори за преобликување на американската дипломатија и поставување кадар кој целосно ги поддржува приоритетите на Трамп и неговата политика „Америка на прво место“.
Шефовите на дипломатските мисии во најмалку 29 земји минатата недела биле известени дека нивните мандати ќе завршат во јануари, изјавиле двајца претставници на Стејт департментот, кои побарале анонимност. Повлечените дипломати не ја губат својата работа во службата за надворешни работи и, доколку сакаат, ќе се вратат во Вашингтон на други должности.
Сите амбасадори опфатени со оваа одлука биле именувани за време на администрацијата на поранешниот претседател Џо Бајден, но останале на функциите и по првичната „чистка“ на почетокот на вториот мандат на Трамп во јануари, кога главно беа отстранети политички именуваните функционери.
Стејт департментот не го соопшти точниот број на засегнати дипломати, наведувајќи дека станува збор за стандарден процес во секоја нова администрација. Во соопштението се нагласува дека амбасадорот е „личен претставник на претседателот“ и дека претседателот има право да обезбеди во тие земји да има луѓе кои ја унапредуваат неговата агенда „Америка на прво место“.
Најмногу погоден регион е Африка, каде што се повлечени амбасадорите од 13 земји: Бурунди, Камерун, Зеленортските Острови, Габон, Брегот на Слоновата Коска, Мадагаскар, Маврициус, Нигер, Нигерија, Руанда, Сенегал, Сомалија и Уганда.
Следува Азија, со промени во шест земји – Фиџи, Лаос, Маршалските Острови, Папуа Нова Гвинеја, Филипини и Виетнам.
Во Европа, амбасадорски смени ќе има во Ерменија, Северна Македонија, Црна Гора и Словачка.
Промени се најавени и на Блискиот Исток – во Алжир и Египет, како и во Јужна и Централна Азија – Непал и Шри Ланка, и во Западната хемисфера – Гватемала и Суринам.
